Arsénio Paixão Bano simu ona pose, ohin, loron 12 fulan-juñu tinan 2020, hanesan Prezidente Rejiaun Administrativa Oekusi Ambeno (RAEOA), husi Primeiru-Ministru, Taur Matan Ruak, iha serimónia ida ne’ebé hala’o iha Palásiu Governu, iha Dili.

RAEOA harii iha tinan 2014 ho objetivu atu halo dezenvolvimentu inkluzivu iha Rejiaun ne’e, hodi fó prioridade ba atividade ho karater sosioekonómiku kona-ba promosaun komunidade nia kualidade moris nian no moris-di’ak.

Ho nune’e, Arsénio Bano troka José Luis Guterres, iha kargu ne’ebé nia rasik asume interinamente iha tinan 2019, hafoin mandatu eis-Prezidente RAEOA, Mari Alkatiri, nian remata.

Iha nia diskursu hafoin asinatura termu pose, Arsénio Bano, hateten “ho onra boot, nu’udar Oekusi oan”, mak simu kargu Prezidente RAEOA nian, ho misaun atu dezenvolve nia rai moris-fatin.

Prezidente foun halo retrospetiva ida kona-ba progresu ne’ebé alkansa ona iha rejiaun, hahú husi harii RAEOA iha tinan 2014, hodi fó hanoin hikas kona-ba serbisu ne’ebé eis-Prezidente Mari Alkatiri halo ona.

Arsénio Bano promete katak durante ninia mandatu, 95% husi nia tempu nia sei hela de’it iha Oekusi no sei halo esforsu tomak ba dezenvolvimentu rejiaun ne’e nian.

Primeiru-Ministru, Taur Matan Ruak, hahú ho agradesimentu ba José Luis Guterres, “ne’ebé asume ninia misaun iha períodu ne’ebé akontese perturbasaun polítika” no “mós ho situasaun COVID-19”.

Xefe Governu hateten mós katak Prezidente foun ho nia ekipa bele hein apoiu tomak husi Governu sentrál no apela ba Oekusi oan hotu atu hamutuk, hodi dezenvolve rejiaun ne’e.