……………………………………………………………………………………………………………
Komunikadu Imprensa
Sorumutuk Konsellu Ministrus nian loron 3 fulan-Juñu tinan 2020
Konsellu Ministrus hala’o sorumutuk iha Palásiu Governu, iha Dili, no aprova ona projetu kona-ba deliberasaun, ne’ebé Ministru Finansas, Fernando Hanjam, aprezenta, ne’ebé hatuur valór husi dotasaun orsamentál temporária ba fulan-juñu tinan 2020 nian hamutuk dolar amerikanu millaun 122,3 (ne’ebé inklui pagamentu ba empréstimu). Entre despeza sira seluk, valór ne’e inklui dolar amerikanu millaun 3,3 ba pagamentu Nakroma II no dolar amerikanu millaun hitu hodi asegura pagamentu subsídiu estraordináriu, husi remunerasaun 60%, iha ámbitu medida apoiu nian ba empregu.
Konsellu Ministrus mós aprova ona Proposta Lei, ne’ebé Ministru Finansas aprezenta, ne’ebé ninia objetu mak autorizasaun atu halo transferénsia estraordinária ida husi Fundu Petrolíferu no mós alterasaun dahuluk ba Lei n.2/2020, loron 6 fulan-abríl, ne’ebé kria Fundu COVID-19 nian. Haree katak reseita ne’ebé maihusi reseita fiskál no husi saldu ezekusaun orsamentál tinan kotuk nian, ne’ebé komplementa ho transferénsia estraordinária husi Fundu Petrolíferu nian, ne’ebé hetan ona autorizasaun tuir Lei n.2/2020, loron 6 fulan-abríl, la sufisiente atu finansia atividade regulár Administrasaun Públika nian to’o fulan-agostu, no tanba montante ne’ebé atribui ona ba orsamentu Fundu COVID-19 nian mós la kobre despeza hotu ne’ebé prevee iha medida sira ba prevensaun no kombate hasoru pandemia COVID-19 nian, diploma ida-ne’e ninia objetivu mak atu fó autorizasaun hodi hala’o transferénsia estraordinária husi Fundu Petrolíferu ba Orsamentu Jerál Estadu, ho valór dolar amerikanu 286.800.000, hodi garante kondisaun finanseira ne’ebé sufisiente ba funsionamentu normál Administrasaun Públika nian to’o Orsamentu Jerál Estadu nian ba tinan 2020 hetan aprovasaun.
Proposta Lei ne’e halo mós alterasaun dahuluk ba Lei n. 2/2020, loron 6 fulan-abríl, ne’ebé autoriza ona realizasaun transferénsia estraordinária ida husi Fundu Petrolíferu iha tinan finanseiru 2020 no ne’ebé kria ona Fundu COVID-19, atubele klarifika katak entre finalidade sira Fundu ne’e nian, ida maka finansiamentu ba medida apoiu ekonómiku no protesaun sosiál atu hatán ba konsekuénsia ekonómika husi medida prevensaun no kombate hasoru moras COVID-19 no hasoru krize ekonómika mundiál ne’ebé provoka husi pandemia ne’e, nune’e mós ba despeza ba funsionamentu Fundu ne’e rasik.
Konsellu Ministru aprova ona Proposta Lei, ne’ebé Ministru Finansas mós mak aprezenta, ba alterasaun dahuluk ba Lei n.14/2009, loron 21 fulan-outubru, kona-ba Estatutu Remuneratóriu ba Titulár Kargu Polítiku nian sira. Ho alterasaun ida-ne’e, Vise-Ministru sira ka Sekretáriu Estadu ne’ebé substitui respetivu Ministru sira iha ezersísiu ba sira-nia funsaun ho períodu ne’ebé maka boot liu fulan tolu, sei simu remunerasaun ne’ebé koresponde ba kargu Ministru nian hahú husi tempu sira ezerse funsaun iha rejime substituisaun no to’o remata. Diploma ida-ne’e hahú vigora iha loron Governu Konstitusionál VIII nian simu pose. REMATA