Governu partisipa ona ohin, loron 1 fulan-juñu, iha debate ho membru sira husi Parlamentu Nasionál, kona-ba ezekusaun Fundu COVID-19 nian.
Partisipa iha sesaun ne’e maka Ministru Prezidénsia Konsellu Ministrus, Fidelis Manuel Leite Magalhães, Ministru Asuntus Parlamentares no Komunikasaun Sosiál, Francisco Martins da Costa Jerónimo, Ministru Finansas, Fernando Hanjan no Vise-Ministra Finansas, Sara Lobo Brites.
Membru Governu sira aprezenta dadus kona-ba ezekusaun no implementasaun medida sira iha ámbitu Fundu COVID-19 nian no hatán ona ba preokupasaun no sujestaun husi deputadu Parlamentu Nasionál nian sira.
Vise-Ministra Finansas informa ona katak taxa ezekusaun Fundu COVID-19 nian liu ona husi 45%.
Ministru Prezidénsia Konsellu Ministrus esplika ona katak medida sira ba normalizasaun no rekuperasaun ekonómika iha ámbitu pandemia COVID-19 nian momentu ida-ne’e iha ona faze implementasaun.
Medida hirak ne’e fahe ba komponente prinsipál tolu – komponente dahuluk kona-ba apoiu sira ne’ebé mak Estadu deziste husi reseita sira, hanesan ezemplu mak izensaun parsiál iha pagamentu kontas enerjia elétrika, komponente daruak kona-ba asesu ba kréditu, mekanizmu apoiu nian ba empreza sira mikro, empreza ki’ik no empreza média (MPME), liuhusi ida-ne’ebé mak Estadu responsabiliza hamutuk risku konsesaun kréditu nian ho banku komersiál sira no komponente datoluk maka kona-ba transferénsia direta osan nian, hanesan kazu apoiu osan ba uma kain sira iha ámbitu pandemia husi COVID-19.
Medida apoiu nian ba uma kain sira sei kobre família rihun 320 resin no prosesu identifikasaun no revizaun kona-ba benefisiáriu sira iha ona prosesu finalizasaun nian no prevee katak to’o iha fulan ida-ne’e nia rohan apoiu ne’e sei bele hahú selu ona.
Ministru Prezidénsia Konsellu Ministrus hatete mós katak medida sira iha pakote rekuperasaun ekonómika fundamentál ba setór ekonómiku atubele kontinua funsiona, atu ema sira ne’ebé afetadu husi efeitu negativu COVID-19 nian bele hetan protesaun husi lakon rendimentu no dezempregu no atu empreza sira neebé hasoru difikuldade bele hala’o nafatin sira-nia atividade, atubele garante sustentabilidade husi ekonomia nasionál.