……………………………………………………………………………………………………………
Komunikadu Imprensa
Sorumutuk Konsellu Ministrus nian loron 21 fulan-Maiu tinan 2020
Konsellu Ministrus hala’o sorumutuk iha auditóriu Kay Rala Xanana Gusmão, iha Ministériu Finansas, Dili, no aprova ona projetu deliberasaun, ne’ebé Ministru Justisa, Manuel Cárceres da Costa, aprezenta, kona-ba autorizasaun exesionál atu utiliza verba husi kapitál menór iha rejime duodesimál. Deliberasaun ne’e ninia objetivu mak atu permite selu servisu sira ne’ebé presta ona kona-ba fornesimentu ekipamentu informátiku no mobiliáriu sira ba Ministériu Justisa.
Konsellu Ministrus aprova projetu deliberasaun ne’ebé Ministra Finansas iha ezersísiu, Sara Lobo Brites, aprezenta, kona-ba autorizasaun atu selebra akordu ida entre Governu Timor-Leste no Governu Austrália, kona-ba kontribuisaun finanseira direta, ne’ebé Governu Austrália atu realiza, ho valór dolar australianu millaun hitu, atu apoia rezilénsia komunitária no rekuperasaun ekonómika iha Timor-Leste durante pandemia COVID-19. Konsellu Ministrus delega kompeténsia atu asina akordu ne’e ba Ministra Finansas iha ezersísiu, hodi Governu Timor-Leste nia naran.
Ministra Finansas iha ezersísiu aprezenta mós projetu deliberasaun, ne’ebé hetan ona aprovasaun husi Konsellu Ministrus, kona-ba autorizasaun atu selebra akordu ida entre Governu Timor-Leste no Organizasaun Internasionál Traballu (OIT) kona-ba subvensaun ida iha ámbitu programa “Leaving no one behind in Timor- Leste’s COVID-19 response – Finantial Support for the Implementation of the cash transfer scheme for low-income households” (“La husik ema ida ba kotuk iha resposta ba COVID-19 iha Timor-Leste – apoiu finanseiru ba implementasaun sistema transferénsia apoiu ba família sira ho rendimentu ki’ik”).
Bazeia ba akordu ne’e, OIT sei fó osan ho valór dolar amerikanu rihun 748, ba Governu Timor-Leste nian, hodi finansia kustu operasionál sira husi implementasaun apoiu umakain sira iha Timor-Leste, ne’ebé aprova husi Dekretu-Lei n. 15/2020, loron 30 fulan-abríl. Ministra Finansas iha ezersísiu simu ona podér tomak hodi asina akordu ne’e.
Konsellu Ministrus aprova ona autorizasaun atu selebra kontratu sosa foos tonelada rihun 30 husi Repúblika Sosialista Vietname, ne’ebé aprezenta husi Komisaun Nasionál Aprovizionamentu Timor-Leste, husi Ministériu Planeamentu no Investimentu Estratéjiku no Ministériu Turizmu, Komérsiu no Indústria hodi reforsa stock foos ne’ebé eziste iha país ne’e hodi hatán ba situasaun falta foos karik durante pandemia COVID-19. Konsellu Ministrus delega kompeténsia atu asina kontratu ne’e ba Administradór Sentru Lojístiku Nasionál (SLN), hodi Governu Timor-Leste nia naran.
Konsellu Ministrus aprova ona Orgánika Governu Konstitusionál VIII nian, no halo ona alterasaun rua, relasiona ho diploma ne’ebé aprova ona iha sorumutuk Ezekutivu nian ida liubá. Alterasaun dahuluk refere ba orden presedénsia membru Governu sira nian. Nune’e, Primeiru-Ministru tuir kedas husi Vise-Ministru na’in rua, tuir fali ho Ministru Prezidénsia Konsellu Ministrus, ne’ebé tuir husi Ministru Koordenadór Asuntus Ekonómikus, no tuir fali maka ministru sira seluk, bazeia ba estrutura ne’ebé aprova ona iha semana kotuk.
Dekretu-Lei ne’ebé hetan ona aprovasaun ne’e prevee mós alterasaun ida ba kompeténsia sira ne’ebé atribui ba Ministru Negósius Estranjeirus no Kooperasaun, ne’ebé sai nu’udar responsavel hodi organiza, dinamiza ka partisipa iha tipu atividade saida de’it ne’ebé nesesáriu ba estabelesimentu no funsionamentu plataforma kooperasaun nian ida no dezenvolvimentu ekonómiku integradu sub-rejionál entre Timor-Leste, Indonézia no Austrália.
Tuir alterasaun ne’ebé halo ona ba orgánika ne’e, Konsellu Ministrus aprova ona mós projetu Dekretu-Lei kona-ba estinsaun unidade misaun ad hoc ba dezenvolvimentu ekonómiku sub-rejionál integradu no ninia estrutura orgánika. Ho diploma ne’e, maka revoga ona Dekretu-Lei n. 17/2014, loron 16 fulan-jullu no atribuisaun sira unidade ida ne’e nian, Ministériu Negósius Estranjeirus no Kooperasaun maka sei hala’o.
Konsellu Ministrus aprova ona kalendáriu kona-ba preparasaun Orsamentu Jerál Estadu ba tinan fiskál 2020 nian. Tuir kalendáriu ne’ebé hetan ona aprovasaun ne’e, proposta Lei ne’e sei hetan apresiasaun iha sorumutuk Konsellu Ministrus nian loron 22 fulan-jullu tinan 2020 no submete ba Parlamentu Nasionál iha loron 30 fulan-jullu tinan 2020. REMATA