……………………………………………………………………………………………………………
loron 8, Fulan-Abril, Tinan 2020
Komunikadu Imprensa
Governu asina akordu ho Airnorth atu garante kontinuasaun konetividade servisu aéreu sira
Governu Timor-Leste, liuhusi Ministru Transportes no Komunikasoins, José Agostinho da Silva, asina ona iha tersa, loron 7 fulan-abríl, akordu ida ho Airnorth ne’ebé sei permite kontinuasaun servisu aéreu sira entre Dili no Darwin. Akordu ne’e hetan ona aprovasaun foin lalais ne’e husi Konsellu Ministrus, tuir esplikasaun portavós Governu nian, Ministru Estadu Prezidénsia Konsellu Ministrus, Agio Pereira.
Hanesan determina ona iha akordu ne’e, Airnorth sei semo ba mai semana ida dala tolu entre Dili no Darwin hodi tula ai-moruk, emerjénsia médika no fornesimentu sasán no servisu esensiál sira. Servisu sira ne’e, sei hahú iha semana oin, ho semo dahuluk hala’o iha sesta, loron 10 fulan-abríl ne’e.
Krize husi covid-19, daudaun ne’e iha ona impaktu ida ne’ebé maka seidauk akontese durante ne’e ba kompañia aérea hotu-hotu iha mundu tomak. Iha semana hirak ikus ne’e, prestadór servisu balu, ne’ebé inklui Airnorth no Air Timor, fó sai ona sesasaun servisu iha Dili no mós iha fatin seluk tan. Medida hirak ne’e mosu hanesan resposta ba restrisaun viajen nian ho eskala boot ne’ebé dekreta ona hodi hapara propagasaun covid-19, inklui restrisaun tránzitu no kuarentena ne’ebé Governu Singapura impoin ona. Sesasaun servisu aéreu hotu-hotu daudaun ne’e halo Timor-Leste sai izoladu, sein iha konetividade globál ne’ebé mak esensiál ba movimentu merkadoria, fornesimentu médiku sira ka ba transporte pasajeiru sira iha situasaun emerjénsia nian.
Akordu ne’ebé asina ona entre Governu Timor-Leste no Airnorth garante kontinuasaun konetividade aérea nian ba Timor-Leste. Bainhira krize globál covid-19 la iha ona, parte sira antesipa tranzisaun neineik ida ba prestasaun servisu regulár pasajeiru nian sira. Durante ne’e, servisu Airnorth nian sei funsiona, liuliu ba tula materiál médiku, merkadoria sira no emerjénsia nian.
“Laiha buat ida mak importante liu fali saúde no ita-nia povu nia seguransa”, Ministru Agio Pereira hateten.
“Hanesan ita hotu hatene, surtu covid -19 deklaradu ona hanesan emerjénsia mundiál saúde públika ida ne’ebé sai preokupasaun internasionál no afeta hela nasaun barak iha mundu tomak.”
“Governu Timor-Leste foti medida konkreta sira hodi proteje povo timoroan no garante seguransa ba ita-nia nasaun.”
Ministru José Agostinho da Silva hateten katak “ita-nia Governu iha responsabilidade atu mantein rota tránzitu aéreu nian ida hodi garante katak ita bele kontinua lori materiál atu ajuda ita hodi hasoru dezafiu sira ne’ebé maihusi covid-19”.
Ministru Agio Pereira hatutan “Governu halo nafatin serbisu to’o oras ne’e hodi garante solusaun ida ne’ebé lais no ekonómika ba konetividade aérea nian. Maske Airnorth hakotu ona ninia servisu iha fatin barak tanba impaktu covid-19, kompañia aérea ne’e konkorda ona atu kontinua semo ba mai Dili dala tolu semana ida, bazeia ba parseria ne’e. Ami alkansa ona akordu ida iha ne’ebé Governu asume parte ida husi kustu no simu reseita ba servisu ne’e, no ita hein atu ba oin iha tranzisaun neineik ba asesu ne’ebé boot liu no kontínuu ba pasajeiru sira bainhira restrisaun viajen nian daudaun ne’e hasai ona”.
“Inisiativa ne’e sei importante mós ba ita-nia empreza sira ne’ebé depende liu ba ligasaun aérea sira ba transporte merkadoria sira nian.”
“Ami agradese ba Airnorth ba ninia apoiu kontínuu no ba fleksibilidade ne’ebé hatudu husi ninia CEO Daniel Bowden, ne’ebé lidera pesoalmente prosesu negosiasaun nian. Ami hetan akonsellamentu ho di’ak husi Stephen Webb no ninia ekipa aviasaun DLA Piper, atubele garante katak akordu ne’e bele implementa lalais ona no ho kustu ne’ebé di’ak, no hanesan jestu ba ami-nia povu, apoiu husi DLA Piper ne’e fornese ona ho forma pro bono.”
Ministru Pereira afirma mós: “Lori povu Timor-Leste nia naran, hakarak rekoñese korajen no serbisu maka’as ita-nia profisionál sira saúde nian durante krize ne’e. Ha’u hakarak mós atu rekoñese apoiu husi Governu Australianu ne’ebé permite realizasaun teste médiku sira iha Darwin no traballadór Airnorth hirak ne’ebé sei kontinua halo servisu ne’e durante tempu susar sira-ne’e”. REMATA