Medida sira Kona-ba Sirculasaun Internasional durante estadu emerjénsia
Prezidénsia Konsellu Ministrus
VIII Governu Konstitusionál
...........................................................................................................................
loron 28 fulan marsu tinan 2020
Komunikadu Imprensa
Medida sira Kona-ba Sirculasaun Internasional durante estadu emerjénsia
Refere ba deklarasaun estadu emerjénsia, hetan aprovasaun iha Konsellu Ministrus husi loron 28 fulan-marsu 2020, Dekretu Governu nian ne’ebé halo enumerasaun ba medida sira husi ezekusaun husi deklarasaun estadu emerjénsia.
Medida sira ne’ebé aprovadu iha objetivu atu prevene COVID-19, halo kontensaun ba pandemia, salva ema nia vida no garante subsisténsia husi kadeia abastesimentu husi beins no servisu sira ne’ebé esensiál ba ita nia populasaun, maske sira ne’e bele limita liberdade no direitu fundamentál balu. Medida sira ne’e sei hola ho respeitu ba limite konstitusionál sira no tuir orientasaun sira husi Organizasaun Mundiál Saúde no ezemplu husi Estadu sira seluk.
Estadu emerjénsia tama iha vigor iha 00:00 oras husi loron 28 fulan-marsu 2020 to’o oras 23:59 husi loron 26 fulan-abril 2020 no aplika ba territóriu nasionál tomak.
Kona ba sirkulasaun internasionál, Dekretu Governu nian halo proibisaun ba estranjeiru sira atu tama iha territóriu nasionál, exetu estranjeiru sira ne’ebé moris iha Timor-Leste, sidadaun sira ne’ebé rezidente no reprezentante legál husi menór sira ho nasionalidade timorense. Primeiru-Ministru bele fó autorizasaun exesionál ba estranjeiru ruma atu tama, iha kazu sira ne’ebé ho fundamentasaun, ne’ebé relasiona ho defeza husi interese nasionál ka konveniénsia husi servisu. Proibisaun ida ne’e la aplika ba traballadór sira husi plataforma petrolífera iha Tasi Timor.
Estranjeiru sira ne’ebé responsavel ba transporte merkadoria ka liberasaun husi merkadoria sira ne’ebé importadu tenke mantein iha zona internasionál husi portu, aeroportu ka postu fronteira.
Ema hotu ne’ebé hakarak sai husi país tenke tuir kontrolu sanitáriu, liu liu ho medisaun husi temperatura ka meiu diagnóstiku seluk. Exetu iha kazu evakuasaun médika, sira ne’ebé hatudu sintoma COVID-19, isin manas liu 38º C, me'ar no/ka difikuldade atu dada iis, sei la fó halo viajen no lori ba estabelesimentu saúde atu hala’o ezame diagnóstiku ba COVID-19.
Ema hotu ne’ebé tama iha país tenke tama ba kuarentena pelumenus loron 14, karik hatudu sintoma COVID-19 tenke halo obrigatóriu ezame diagnóstiku COVID-19 no karik pozitivu sei sujeita ba izolamentu terapeutiku. FIM
