Estadu emerjénsia, ohin, loron 26 fulan-marsu tinan 2020, hetan ona aprovasaun husi Parlamentu Nasionál, ho unanimidade, ho votu afavór 64 no laiha votu kontra ka abstensaun. Ho nune’e, Parlamentu Nasionál autoriza Prezidente Repúblika atu deklara estadu emerjénsia, hodi hatán ba pandemia COVID-19, tanba verifika duni situasaun kalamidade públika ida.

Deklarasaun ba estadu emerjénsia ne’e abranje territóriu nasionál no sei vigora durante loron 30, hahú husi tuku 00:00, loron 28 fulan-marsu, tinan 2020 to’o tuku 23:59, loron 26, fulan-abríl tinan 2020. Governu maka iha kompeténsia atu ezekuta deklarasaun estadu emerjénsia. Governu tenke informa nafatin Prezidente Repúblika no Parlamentu Nasionál kona-ba atu sira-ne’ebé hola hodi ezekuta deklarasaun estadu emerjénsia.

Iha sorumutuk Konsellu Ministrus oinmai, Governu sei aprova Dekretu-Lei ne’ebé sei determina medida dahuluk sira ne’ebé sei implementa durante período  ne’ebé estadu emerjénsia nian ne’e vigora hela. Neineik-neineik no tuir evolusaun situasaun nian, Governu sei avalia implementasaun ba medida sira seluk ne’ebé sei estabelese, tuir planu kona-ba prevensaun no kombate COVID-19.

Deklarasaun estadu emerjénsia fó dalan ba Governu hodi asegura meiu legál sira ne’ebé nesesáriu atubele intervein lalais iha prevensaun ba surtu COVID-19 foun mosu iha Timor Leste no, karik ida ne’e akontese, sei foti medida hirak ne’ebé nesesária no adekuada hodi kombate virus ne’e labele da’et habelar.

Debate ne’e konta ho partisipasaun husi Primeiru-Ministru, Taur Matan Ruak, ne’ebé akompaña husi Ministru Reforma Lejizlativa no Asuntus Parlamentares, Fidelis Manuel Leite Magalhães, husi Ministru Negósius Estranjeirus no Kooperasaun, Dionísio da Costa Babo Soares, husi Ministru Defeza no Ministru Interiór iha ezersísiu, Filomeno Paixão de Jesus, no husi Ministra Saúde Interina, iha ezersísiu, Élia António de Araújo dos Reis Amaral.

Atu lee intervensaun husi Primeiru-Ministru iha Parlamentu Nasionál, klike iha ne’e