Hahú kedas husi tersa-feira, loron 24 fulan-marsu tinan 2020, liña emerjénsia telefónika ida ba COVID-19 nian funsiona ona. Númeru ne’e maka 119.

Liña telefónika ida-ne’e Ministru Transportes no Komunikasoins, José Agustinho da Silva, maka fó-sai iha sorumutuk estraordináriu Konsellu Ministrus nian, iha segunda-feira, loron 23 fulan-marsu tinan 2020.

Liuhusi ligasaun ba númeru 119, populasaun, karik iha sintoma COVID-19 nian, hanesan isin-manas, me’ar ka dada iis susar, bele halo kontaktu gratuitu ba profisionál saúde nian sira, atu sira bele atua lalais no ativa mekanizmu sira ne’ebé iha ona.

Governu apela ba populasaun atu uza servisu telefóniku ida-ne’e ho responsabilidade, tanba bainhira la uza loloos bele atraza resposta ba situasaun grave sira no okupa rekursu sira la’ós ba nia objetivu.

Disponibilizasaun gratuita liña emerjénsia nian ida-ne’e hetan apoiu husi operadór telekomunikasaun nian tolu iha país ne’e, hanesan Telemor, Telkomcel no Timor Telecom.

Daudaun ne’e, iha Timor-Leste, iha ona kazu COVID-19 ida ne’ebé konfirmadu ona, no teste ne’ebé halo ona ba kazu suspeitu sanulu seluk, ninia rezultadu negativu.

Ministériu Saúde husu ba populasaun atu hakmatek nafatin no hodi halo tuir medida preventiva sira tuirmai ne’e:

1. Labele halibur malu barabarak;
2. Hela iha uma de’it no labele sai ba mai karik la iha nesesidade importante;
3. Fase liman beibeik ho bee no sabaun no/ka uza dezinfetante;
4. Bainhira fani ka me’ar, tenke taka ibun ka inus ho liman sikun laran, ka uza lensu, no tenke soe kedas lensu ne’e iha lixu no fase liman ho bee no sabaun;
5. Labele kaer oin, matan no ibun;
6. Hadook an, pelumenus metru ida, husi ema ne’ebé ho sintomas isin-manas, me’ar no fani;
7. Han hahán no na’an ne’ebé te’in tasak didi’ak;
8. Karik iha sintomas hanesan me’ar, isin-manas no dada iis susar, tenke:

- uza máskara

- hela iha uma;

- Buka asisténsia médika, halo favór kontaktu ba númeru 119.

Hodia haree panfletu informativu sira kona-ba oinsá prevene COVID-19 klike iha ne’e