Sorumutuk Estraordináriu Konsellu Ministrus nian loron 16 fulan-Marsu tinan 2020
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian loron 16, fulan-marsu, tinan 2020
Konsellu Ministrus hala’o sorumutuk iha Palásiu Governu, iha Dili, no deside ona atu husu ba Sua Exelénsia Prezidente Repúblika atu deklara Estadu Emerjénsia, tanba preokupasaun maka’as loos kona-ba situasaun epidemiolójika no aumentu husi kazu sira hada’et COVID-19 nian ne’ebé rejista ona iha eskala globál, ne’ebé mak ezije aplikasaun husi medida estraordinária sira no ho karakter urjente hodi trava pandemia ne’e. Tanba-ne’e, Konsellu Ministrus aprova ona mós Rezolusaun Governu nian ida ho medida lubun ida ho objetivu atu intensifika prevensaun no sensibilizasaun populasaun nian. Diskute mós medida sira seluk ne’ebé sei hetan aprovasaun hafoin deklarasaun Estadu Emerjénsia.
Membru sira Konsellu Ministrus nian analiza ona mós estragu hirak ne’ebé provoka husi udan boot iha loron-sesta semana kotuk. Udan boot ne’ebé halo bee sa’e, estraga maka’as sasán barak iha sidade Dili laran tomak, ema barak tebes mak afetadu, barak maka lakon sira-nia uma, kanek no iha ida maka mate. Analiza ona mós medida hirak ne’ebé presiza atu hadi’a estragu sira ne’ebé provoka husi bee-sa’e no medida apoiu nian ba populasaun hirak ne’ebé afetadu. Konsellu Ministrus analiza ona mós medida lubun ida ba tempu badak no tempu naruk nian atu, iha futuru, bele hamenus efeitu husi udan boot.
Ikusliu, Konsellu Ministrus deside ona atu fó toleránsia pontu iha loron 17 no 18 fulan-marsu, hodi nune’e ema hotu bele partisipa iha asaun limpeza no rekuperasaun ba estragu sira ne’ebé akontese iha loron-sesta liubá. Toleránsia pontu ne’e abranje de’it munisípiu Dili no la aplika ba servisu esensiál sira hanesan seguransa, saúde, protesaun sivíl no seluk-seluk tan. Ministériu sira sei indika servisu sira ne’ebé maka konsidera nu’udar importante. Funsionáriu sira tenke mantein nafatin kontaktu atu nune’e bele mai servisu bainhira presiza. HOTU
