Sorumutuk Konsellu Ministrus nian loron 4 fulan-Marsu tinan 2020
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian loron 4, fulan-marsu, tinan 2020
Konsellu Ministrus hala’o sorumutuk iha Palásiu Governu, iha Dili, no aprova ona projetu Dekretu-Lei, ne’ebé Sekretáriu Estadu Ambiente, Demétrio de Amaral de Carvalho, aprezenta, kona-ba alienasaun, importasaun no produsaun saku, embalajen no objetu sira seluk ne’ebé halo uza plástiku.
Diploma ida-ne’e ninia objetivu mak atu prevene no redús impaktu husi rezíduu sira ba ambiente, ne’ebé haree, liuliu, ba produtu husi plástiku ne’ebé uza dala ida de’it. Nune’e, Dekretu-Lei ne’e prevee proibisaun ba alienasaun, distribuisaun, importasaun no produsaun husi objetu balu ne’ebé halo uza plástiku.
Diploma ne’e prevee mós atu estabelese prinsípiu fundamentál hirak tuirmai ne’e: prekausaun, prevensaun, dezenvolvimentu sustentavel, seguransa ambientál globál, poluidór-pagadór, reutilizasaun no resiklajen no valorizasaun enerjétika.
Ministra Saúde iha ezersísiu, Élia António de Araújo dos Reis Amaral, aprezenta ona projetu Dekretu-Lei, ne’ebé Konsellu Ministrus aprova ona, kona-ba kriasaun Servisu Nasionál Ambulánsia no Emerjénsia Médika, I.P.. Projetu atu normativu ne’e ninia objetivu mak atu hasa’e nivel funsionamentu no resposta husi servisu médiku sira ne’ebé bele garante kuidadu urjénsia ka emerjénsia médika nian iha territóriu nasionál, ne’ebé inklui transporte ba ema hirak ne’ebé hetan asidente ka vítima husi moras ne’ebé mosu derrepente, ba instituisaun sira ne’ebé presta kuidadu saúde ne’ebé adekuadu. Servisu Nasionál Ambulánsia no Emerjénsia Médika ne’e kria hanesan pesoa koletiva públika ho forma institutu públiku, ne’ebé hetan autonomia administrativa, finanseira no patrimoniál no hetan tutela no superintendénsia husi membru Governu ne’ebé sai nu’udar responsavel ba área saúde, atu responde lalais no responde ho forma ne’ebé autónoma liután ba nesesidade koletiva sira populasaun nian.
Ministra Finansas iha ezersísiu, Sara Lobo Brites, aprezenta ona projetu Deliberasaun Governu nian, ne’ebé hetan ona aprovasaun husi Konsellu Ministrus, kona-ba limite másimu husi orsamentu ba fulan-marsu iha ámbitu rejime duodesimál, ho valór totál USD$ 116 449 057.
Konsellu Ministrus aprova ona projetu Dekretu-Lei, ne’ebé Ministru Asuntus Kombatentes Libertasaun Nasionál iha ezersísiu, Gil da Costa Monteiro “Oan Soru”, aprezenta kona-ba alterasaun da-6 ba Dekretu-Lei n. 15/2008, loron 4 fulan-juñu, ne’ebé regulamenta pensaun sira ba kombatente no martir libertasaun nasionál nian sira. Ho alterasaun ida-ne’e, pensaun ba kombatente no martir libertasaun nasionál sira nian sei ko’a sorin, exetu iha kazu sira iha ne’ebé benefisiáriu sira lakohi atu ko’a sira-nia osan. Montante ne’ebé Estadu ko’a, ninia objetivu mak atu depozita ba konta bankária ne’ebé rejista hodi Konsellu Kombatente Libertasaun Nasionál nian naran no Konsellu ne’e rasik maka jere.
Ministru Administrasaun Estatál iha ezersísiu, Abílio José Caetano, simu podér tomak husi Konsellu Ministrus atu asina Memorandu Entendimentu ida entre Ajénsia Kooperasaun Internasionál Koreia (KOICA, Korea International Cooperation Agency), Programa Nasoins Unidas nian ba Dezenvolvimentu (PNUD) no Governu Repúblika Indonézia no Repúblika Demokrátika Timor-Leste. Kooperasaun Institusionál, ne’ebé prevee iha memorandu entendimentu ne’e sei permite hadi’a kondisaun asesu nian sira ba eletrisidade no ba bee moos husi populasaun iha área remota sira iha munisípiu Baukau, Bobonaru, Dili no Manatutu. HOTU
