Governu Timor-Leste

Prezidénsia Konsellu Ministrus

VIII Governu Konstitusionál

...........................................................................................................................

Komunikadu Imprensa

Sorumutuk Konsellu Ministrus nian loron 19 fulan-fevereiru tinan 2020

Konsellu Ministrus hala’o sorumutuk iha Palásiu Governu, iha Dili no aprova ona projetu Rezolusaun Governu nian ne’ebé aprezenta husi Primeiru-Ministru, Taur Matan Ruak, atu revoga Rezolusaun Governu nian n. 16/2013, loron 10 fulan-jullu, kona-ba estinsaun grupu arte marsiál sira. Governu mós fó instrusaun ba Polísia Nasionál Timor-Leste hodi intensifika asaun hasoru krime ne’ebé iha relasaun ho prátika ilísita arte marsiál no rituál sira.

Konsellu Ministrus aprova ona inisiativa lima, ne’ebé aprezenta husi Ministru Reforma Lejizlativa no Asuntus Parlamentares, Fidelis Manuel Leite Magalhães, Proposta Lei rua, Projetu Dekretu-Lei ida no Projetu Rezolusaun Governu nian rua.

Proposta Lei dahuluk ne’ebé aprova ona refere ba Rejime Jurídiku Seguransa Sosiál ba Titulár Órgaun Soberania nian sira. Rejime legál ida ne’e buka atu promove ezersísiu husi direitu ba Seguransa Sosiál iha kondisaun sira igualdade nian, hodi valoriza karreira kontributiva husi titulár órgaun soberania nian sira.

Proposta Lei daruak fó ba Governu Autorizasaun Lejizlativa kona-ba Baze Jerál sira Organizasaun Administrasaun Públika nian. Intervensaun lejizlativa ne’e ho objetivu atu prienxe lakuna konstitusionál kona-ba organizasaun administrativa, hodi nune’e disponibiliza baze jerál sira ba atuasaun administrasaun públika nian.

Hafoin ida ne’e, Konsellu Ministrus aprova projetu Dekretu-Lei kona-ba Organizasaun ba Administrasaun Direta no Indireta Estadu nian. Objetivu prinsipál husi intervensaun lejizlativa ida ne’e maka organiza ho loloos administrasaun direta no indireta Estadu nian, hodi promove ninia atuasaun ho efikásia no fasilita realizasaun ba ninia atividade sira, liuhusi interoperasionalidade no interkomunikabilidade rekursus umanus no materiál nian sira.

Konsellu Ministrus aprova projetu Rezolusaun Governu kona ba Programa Reforma Administrasaun Públika nian. Programa ida ne’e kontein reforma administrativa lubun ida, ne’ebé ninia objetivu mak atu reforsa jestaun no hadi’a funsionamentu Ministériu no Ajénsia sira Governu Sentrál nian.

Konsellu Ministrus aprova projetu Rezolusaun Governu maka kria Komisaun Interministeriál ba Preparasaun Sistema Identifikadór Úniku Sidadaun sira nian. Sistema ida ne’e sira-nia objetivu mak atu hadi’a prestasaun servisu ba sidadaun sira, atu aumenta inkluzaun sosiál no atu halo lansamentu ba governasaun eletrónika iha nivel nasionál. Komisaun Téknika ne’e sei prezide husi Diretór Ezekutivu Institutu Públiku TIK Timor no integra reprezentante sira husi liña ministeriál relevante sira. Komisaun ne’e iha prazu másimu fulan neen tenke konklui estratéjia integrada ida ba materializasaun sistema identifikadór úniku ne’e, hamutuk ho planu implementasaun detalladu ida no ninia orsamentu rasik, ne’ebé sei submete ba Konsellu Ministrus.

Konsellu Ministrus mós aprova ona projetu Rezolusaun Governu nian, ne'ebé aprezenta husi Ministru Turizmu, Komérsiu no Indústria Interinu, Fidelis Leite MAgalhães, kona-ba nomeasaun Alexandre Pires, nu’udar prezidente Konsellu Administrasaun iha Institutu Kualidade Timor-Leste, IP nian, no Alves Gomes Martins no Cecília da Fonseca, nu’udar vogál sira ba Konsellu Administrasaun ne’e nian. Governu mós nomeia ona Carlito Gama no José Gonçalves ba Konsellu Fiskál  iha Institutu Kualidade Timor-Leste, IP nian.

Ikusliu, Ministru Administrasaun Estatal iha ezersísiu, Abílio José Caetano, aprezenta ona projetu Rezolusaun Governu nian, ne’ebé aprova ona husi Konsellu Ministrus, kona-ba nomeasaun Filomena da Costa Nunes, nu’udar Administradora foun Munisípiu Manufahi nian, kargu ne’ebé mamuuk husikedas fulan-outubru tinan 2018, tanba titulár husi kargu ne’e mate ona. REMATA