Autoridade Nasionál Petróleu no Minerais (ANPM), lori Ministériu Petróleu no Minerais nia naran, asina ona, iha loron 14 fulan-fevereiru tinan 2020, Akordu ida kona-ba Esplorasaun Mármore ho kompañia Elegant Marble Group Unip, Limitada (EMG), hafoin halo negosiasaun fulan barak nia laran, entre parte rua ne’e. Serimónia asinatura ne’e hala’o iha Auditóriu Kay Rala Xanana Gusmão, iha Ministériu Finansas.

Akordu kona-ba Esplorasaun ne’e nia objetivu mak atu estabelese estrutura ida ba avaliasaun kona-ba potensiál rekursu mármore sira nian, ba dezenvolvimentu komersiál, iha rejiaun Ilimanu, Suku Uma Kaduak, Postu Administrativu Lakloo, Munisípiu Manatutu, ba períodu ida ho durasaun fulan sanulu-resin ualu.

ANPM maka responsavel ba jestaun no regulasaun ba atividade petrolífera no minerál sira iha área Timor-Leste nian, tantu iha offshore no mós iha onshore.

Prezidente ANPM, Gualdino da Silva, iha ninia intervensaun, ko’alia kona-ba importánsia husi akordu esplorasaun nian ne’e ba dezenvolvimentu husi potensiál rekursus minerais iha Timor Leste.

Gualdino da Silva afirma katak “EMG hanesan kompañia internasionál ida, ne’ebé mai husi Xina, iha esperiénsia barak iha setór rekursus minerais, ne’ebé hahú husi esplorasaun, dezenvolvimentu, estrasaun to’o marketing, la’ós de’it iha Xina maibé iha mundu tomak”.

Prezidente ANPM nian ne’e hateten mós katak “akordu ba períodu fulan 18 ida-ne’e, iha planu ne’ebé klaru kona-ba atividade, programa, kronograma no orsamentu”.

Gualdino da Silva haktuir mós katak Timor Leste “sei hetan benefísiu husi produtu, royalties no impostu sira” no “sei fó prioridade ba kontratasaun traballadór timoroan sira”. Nia mós hatutan tan katak “karik esplorasaun la’o duni, sei utiliza produtu no servisu husi fornesedór lokál sira”.