Inaugura ona, iha loron 30 fulan-janeiru tinan 2020, estrutura rai udan-been nian ida iha Eskola Ensinu Báziku Suku Kribas, Munisípiu Manatutu.

Estrutura ne’e bele rai bee to’o litru rihun-atus-ida, ne’ebé bele hatán ba nesesidade eskola nian durante tinan ida-nia laran, mezmu iha tempu bailoro, hodi benefisia labarik hamutuk 738.

Partisipa iha inaugurasaun ne’e, Ministra Edukasaun, Juventude no Desportu, Dulce de Jesus Soares, Ministru Agrikultura no Peskas, José Gusmão dos Reis Martins, Embaixadór Uniaun Europeia nian iha Timor-Leste, Andrew Jacobs, reprezentante sira husi FAO (Organizasaun Nasoins Unidas ba Ai-han no Agrikultura), Administradór Munisípiu Manatutu no Xefe Suku Kribas.

Inisiativa atu harii sistema rai udan-been nian ne’e maihusi Ministériu Agrikultura no Peskas (MAP) no Administrasaun Munisípiu Manatutu, ho apoiu husi Uniaun Europeia (EU) no husi FAO, ne’ebé hamutuk atu limita efeitu husi bailoro iha munisípiu Manatutu. Sistema rai udan-been durante tempu udan, husi fulan-novembru to’o fulan-marsu, ne’ebé utiliza infraestrutura sira ne’ebé iha, hanesan uma kakuluk, bele tulun hakmaan problema bailoro nian.

Ministra Edukasaun, Desportu no Juventude haktuir katak “foin ba dahuluk maka estrutura ida hanesan ne’e harii iha eskola ida iha Timor-Leste”, nia hatutan katak sistema ne’e “fó solusaun prátika ida atu rezolve problema asesu ba bee moos ba labarik eskola-oan sira.

Ministru Agrikultura no Peskas agradese ba “apoiu husi Uniaun Europeia no kooperasaun di’ak entre instituisaun rua” no esplika katak “kondisaun klimátika iha Timor-Leste karakterizada ho udan boot, ne’ebé tuir fali ho bailoro naruk. Iha fatin barak iha país ne’e, udan la tuun durante fulan neen iha tinan ida nia laran, no iha tempu udan ema la rai udan-been. Ho apoiu husi UE, FAO no MAP bele hatudu katak ita bele uza infraestrutura ne’ebé iha, hanesan edifísiu públiku no privadu sira-nia kakuluk, hodi tau-hamutuk udan-been iha tempu udan”.

Xefe Suku Kribas, Eurico Alves, hateten katak “Suku Kribas afetadu beibeik husi bailoro no populasaun lokál terus ho falta bee moos durante bailoro, liuliu labarik eskola-oan sira. Husi bee-matan hitu ne’ebé eziste iha Kribas, bee-matan rua de’it mak iha bee durante bailoro, ne’ebé kauza difikuldade barak ba populasaun”.

Embaixadór Uniaun Europeia nian manifesta katak “UE sente orgullu tebes ho kooperasaun entre Governu Timor-Leste ho FAO iha projetu inovadór ne’e. Estrutura rai udan-been nian ne’ebé harii iha Kribas bele harii iha fatin sira seluk país nian”.

Inisiativa ne’e destaka mós biban ba Ministériu Agrikultura no Peskas no Ministériu Edukasaun, Desportu no Juventude atu haforsa serbisu-hamutuk iha programa Merenda Eskolár, ne’ebé iha potensiál atu fornese merkadu institusionál ida ne’ebé estavel ba ai-han lokál sira ne’ebé agrikultór sira prodús.