Sorumutuk Konsellu Ministrus nian loron 12 fulan-fevereiru tinan 2020
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian loron 12 fulan-fevereiru tinan 2020
Konsellu Ministrus hala’o sorumutuk iha Palásiu Governu, iha Dili, no aprova ona projetu lejizlativu rua kona-ba prosesu desentralizasaun administrativa nian, ne’ebé Ministru Administrasaun Estatál iha ezersísiu, Abílio José Caetano, aprezenta.
Projetu Dekretu-Lei dahuluk liga ba alterasaun daruak husi Dekretu-Lei n. 3/2016 loron 16 fulan-marsu, ne’ebé aprova Estatutu Administrasaun Munisipál sira-nian, Autoridade Munisipál sira-nian no Grupu Tékniku Interministeriál ba Desentralizasaun Administrativa. Ho alterasaun ida-ne’e adota medida konkreta lubuk ida ba konkretizasaun prosesu deskonsentrasaun no desentralizasaun administrativa, liuliu kona-ba kriasaun no estabelesimentu podér lokál autárkiku nian, espesialmente revizaun kuadru jurídiku nian ba organizasaun no funsionamentu Autoridade Munisipál no Administrasaun Munisipál sira-nian.
Projetu lejizlativu daruak refere ba Dekretu Governu nian atu harii Portál Munisipál no atu estabelese ninia rejime jurídiku, ninia rejime funsionamentu no ninia rejime jestaun nian. Objetivu husi Portál Munisipál ne’e mak atu fó-sai informasaun kona-ba munisípiu ba públiku, no nune’e, apoia progresu no dezenvolvimentu munisipál iha setór sosiál, ekonómiku, infraestrutura no kulturál. Portál ne’e sai mós nu’udar instrumentu sentrál ida ba rekolla informasaun ho forma ne’ebé koerente, sentralizada no transparente kona-ba munisípiu ida-idak atu prodús informasaun estatístika iha área oioin, liuliu, edukasaun, saúde, seguransa ai-han, obras públikas no transportes, bee, saneamentu báziku no ambiente, agrikultura, jestaun merkadu sira no turizmu, asaun sosiál, protesaun sivíl, jestaun ba dezastre naturál sira, rejistu sira, notariado no serbisu kadastrál sira no apoiu ba organizasaun naun governamentál sira no organizasaun komunitária sira.
Konsellu Ministrus aprova mós orsamentu ho valór dólar amerikanu $511.520 ne’ebé hato’o husi Ministra Edukasaun, Juventude no Desportu, Dulce de Jesus Soares, no husi Sekretáriu Estadu Juventude no Desportu, Nélio Isac Sarmento, ba organizasaun reuniaun preparatória diretores jerais husi CPLP no Jogus Desportivus CPLP XII, eventu multidesportivu ida ba atleta sira ho idade tinan 16 ba kraik, ne’ebé reprezenta nasaun membru sira hotu husi Komunidade País Lian Portugés sira. Aprezenta ona mós ba Konsellu Ministrus knananuk ofisiál eventu ne’e nian, ne’ebé artista nasionál, Maria Vitória no Gerson Oliveira maka hananu. Remata
