Edisaun da-1 husi Kursu Jornalizmu Imprensa nian sei hala’o iha Sentru Kulturál Portugés, Embaixada Portugál nian iha Dili, to’o loron 25 fulan-outubru. Formasaun ida-ne’e realiza iha ámbitu komponente da-2 husi “Parseria atu hasa’e prestasaun serbisu sira liuhusi reforsu ba Jestaun no Supervizaun Finansas Públikas nian iha Timor-Leste” (PFMO – Public Financial Management and Oversight), projetu ida ne’ebé finansia hamutuk husi Uniaun Europeia no husi Camões IP – Instituto da Cooperação e da Língua Portuguesa, ne’ebé konta ho apoiu husi SEKOMS (Sekretaria Estadu ba Komunikasaun Sosiál), husi KI (Konsellu Imprensa) no husi Cenjor (Centro Protocolar de Formação Profissional para Jornalistas, husi Portugal).

Ho oras formasaun nian hamutuk 60, no haree liuliu ba Komunikasaun Sosiál husi imprensa eskrita nian, Kursu ne’e ninia objetivu mak atu kapasita jornalista sira iha matéria jornalizmu imprensa nian, atubele aplika sira-nia téknika iha temátika finansas públikas, tuir kontestu Timor-Leste nian. Formasaun ne’e, ne’ebé hala’o uza lian portugés, fahe ba módulu lima, ne’ebé inklui formasaun kona-ba kódigu deontolójiku, kona-ba eskrita, kona-ba formatu no téknika sira notísia nian, no taka ho módulu kona-ba kriasaun reportajen jornalístika ida.

Formasaun ne’e konta ho supervizaun husi Isabel Nery, formadora husi Cenjor, jornalista no ensaísta ne’ebé serbisu durante tinan 15 iha revista portugeza Visão, no ne’ebé halo kolaborasaun iha publikasaun internasionál oioin no simu prémiu oin-oin.

Cenjor, nu’udar entidade formadora Portugál nian iha área komunikasaun sosiál nian, hahú ninia atividade iha tinan 1988 no dezenvolve asaun formasaun profisionál sira ba jornalista no traballadór sira seluk husi empreza jornalístika nian sira, ho objetivu atu hasa’e serbisu ne’ebé sira presta ba komunidade, liuhusi formasaun kontínua no dignifikasaun ba profisionál informasaun nian sira. Liuhusi kooperasaun ho País sira ho Lian Ofisiál Portugés (PLOP), Cenjor kontribui ona ba formasaun jornalista, no profisionál sira seluk ne’ebé ligadu ba média, husi Angola, Kabu Verde, Giné-Bisau, Mosambike, Saun Tome no Prínsipe no Timor-Leste, ne’ebé benefisia ona formandu atus-resin.

Ida-ne’e hanesan de’it atividade ida husi atividade temátika sira ne’ebé prevee ona iha ámbitu parseria entre Cenjor no PFMO-C2 atu fortalese profisionál komunikasaun sosiál nian sira iha Timor-Leste, liuhusi formasaun sira ne’ebé hala’o iha Dili husi jornalista sira ne’ebé koñesidu tebes iha panorama média nian iha Portugál.