Sorumutuk Konsellu Ministrus nian iha loron 16 fulan-outubru tinan 2019
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian iha loron 16 fulan-outubru tinan 2019
Konsellu Ministrus hala’o sorumutuk iha Palásiu Governu, iha Dili no asiste ona aprezentasaun husi Ministru Defeza, Filomeno da Paixão de Jesus, kona-ba Sistema Nasionál Autoridade Marítima. Hodi konsidera katak tasi identifikadu ona iha Estratéjia Nasionál hanesan vetór fundamentál ba dezenvolvimentu nasaun nian, ne’ebé daudaun ne’e estuda hela opsaun tolu ba instituisaun Autoridade Marítima Nasionál (AMN) nian, ho objetivu atu haforsa pozisaun jeoestratéjika nasionál, ho jestaun ne’ebé efikás ba rekursu sira ne’ebé iha valór boot ne’ebé mak eziste iha tasi laran no hodi asume responsabilidade sira Estadu Kosteiru nian iha kestaun sira hanesan seguransa marítima no protesaun ba meiu ambiente.
Ministra Solidariedade Sosiál no Inkluzaun, Armanda Berta dos Santos, simu ona Podér Tomak atu asina Akordu Subsidiáriu entre Governu Timor-Leste no Governu Federál Austrália nian, kona-ba Programa atu Halakon Violénsia Hasoru Feto iha Timor-Leste (Nabilan). Akordu ida-ne’e, sei selebra bazeia ba Memorandu Entendimentu ne’ebé maka parte rua asina tiha ona iha tinan 2003, sei implementa to’o fulan-juñu tinan 2022, no substitui fali akordu subsidiáriu husi faze Dahuluk ne’ebé hahú iha tinan 2014. Programa Nabilan ne’e hala’o serbisu kona-ba prevensaun no hadi’a servisu sira apoiu nian no asesu ba justisa, ho objetivu atu garante katak feto no labarik sira iha Timor-Leste, inklui grupu marjinalizadu sira hanesan ema ne’ebé ho defisiénsia, moris livre husi violénsia no bele kontribui ba sosiedade ida ne’ebé forte liután.
Ministru Negósius Estranjeirus no Kooperasaun, Dionísio da Costa Babo Soares, aprezenta ona ba Konsellu Ministrus alterasaun kona-ba naran sira ne’ebé atu propoin ba Prezidente Repúblika ba xefia Misaun Diplomátika sira Repúblika Demokrátika Timor-Leste nian iha Repúblika Demokrátika Popular Laos no Vatikanu. Remata
