Sekretaria Estadu ba Komunikasaun Sosiál (SEKOMS), liuhusi Diresaun Nasionál Diseminasaun Informasaun (DNDI) nian lansa ona faze daruak “Naroman ba suku”, atividade ida husi programa “Governu iha povu nia-leet” iha Aldeia Quiri-Lelo, Suku Liurai, Munisípiu Aileu, iha loron 27 fulan-setembru tinan 2019.

Programa ‘Naroman ba Suku” ne’e, buka atu lori informasaun ba nivel lokál, besik ba komunidade sira iha suku, hodi fó dalan ba komunidade atu hato’o sira-nia preokupasaun ka obstákulu sira ne’ebé mak sira hasoru, hodi aprezenta ba meiu komunikasaun nasionál sira, atu nune’e sira bele haree di’ak liután komunidade sira-nia preokupasaun ka obstákulu sira. 

Tuir Sekretáriu Estadu ba Komunikasaun Sosiál, Merício Juvinal dos Reis “AKARA”, “programa ne’e kria atu hakbesik Governu no komunidade, atu loke komunikasaun atubele tranzmite informasaun kontínuu ba populasaun iha territóriu tomak”, aleinde ne’e, programa ida ne’e permite “ atubele rona diretamente povu sira-nia preokupasaun no dezafiu ne’ebé mak sira hasoru”.

“Tamba asesu ba informasaun hanesan direitu ida ba sidadaun hotu, labele iha diferensa entre informasaun ne’ebé to’o ba komunidade sira ne’ebé hela iha Dili no ba sira ne’ebé mak hela iha área rurál sira”, tanba ne’e “Governu planeia hodi hadi’a meius hotu ne’ebé disponivel atu nune’e informasaun labele lakon, tanba ne’e mak programa ‘Governu iha povu nia-leet’ tenke eziste nafatin”, hatutan Mericio Akara.

Iha biban hanesan, administradór munisípiu Aileu nian, João Tilman do Rego, hateten katak liuhusi programa ‘Governu iha povu nia leet – Naroman ba Suku’ populasaun Aileu nian bele hato’o sira-nia lian ba Governu Sentrál, liu-liu sira-nia nesesidade kona-ba dezenvolvimentu iha setór hotu-hotu iha sira-nia munisípiu”. “Governu Konstitusionál VIII iha  esforsu hodi lori benefísiu ba populasaun hotu liu hosi programa oin-oin ne’ebé estabelese ona iha nivel  munisipál, iha postu administrativu, iha suku no iha aldeia”.

Iha fatin hanesan, Xefe Suku Liurai, Eli Dias Gomes, hateten, nu’udar lider iha suku ida ne’e, sente “orgullu ho ‘Governu iha povu nia leet – Naroman ba Suku’ tanba liuhusi programa ida ne’e iha posibilidade hodi lori Autoridade Munisipál no Governu sentrál to’o iha ita-nia suku atubele ko’alia diretamente ho ita-nia komunidade”.

 António Nunes nu’udar manorin no Lia-Na’in iha suku ne’e, hateten “sente haksolok ho programa ‘Naroman ba Suku’ tanba liuhusi programa ida ne’e ami sente prezensa ukun-na’in sira nian, ne’ebé mai to’o iha ne’e hodi rona diretamente preokupasaun sira ne’ebé povu hasoru”.

 Lansamentu husi programa ‘Naroman ba Suku’ iha suku Liurai, konta ho partisipasaun husi membru Governu sira, Parlamentu Nasionál, Prokuradoria Direitus Umanus no Justisa (sigla iha lian portugés PDHJ), diretór nasionál sira, ekipa téknika SECOMS nian, autoridade lokál no komunidade sira.