Sorumutuk Konsellu Ministrus nian iha loron 2 fulan-outubru tinan 2019
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian iha loron 2 fulan-outubru tinan 2019
Konsellu Ministrus hala’o sorumutuk iha Palásiu Governu, iha Dili, no asiste ona aprezentasaun hosi Ministru Defeza, Filomeno da Paixão de Jesus, kona-ba planu dezenvolvimentu ba Portu Hera. Objetivu hosi projetu ne’e mak atu transforma Portu Hera ne’e atu sai Portu Militár referénsia nian no prevee atu harii kais akostável, instalasaun sira ba reparasaun, manutensaun no armazenamentu, no mós harii Kuartél ba Komandu Navál nian no ba Autoridade Marítima Nasionál (AMN).
Primeiru-Ministru, Taur Matan Ruak, aprezenta ona proposta Rezolusaun Governu nian, ne’ebé aprova ona hosi Konsellu Ministrus, kona-ba renovasaun mandatu ba membru sira hosi Diresaun Arkivu no Muzeu Rezisténsia Timorense, IP (AMRT). Konsidera katak Konsellu Ministrus, liuhusi proposta Primeiru-Ministru nian, hafoin konsulta Prezidente Repúblika, mak iha kompeténsia atu nomeia membru sira hosi Diresaun AMRT, ba mandatu tinan haat, ne’ebé bele renova. Ho hanoin katak Governu no Prezidente Repúblika konsidera serbisu ne’ebé hala’o durante ne’e husi membru atuál sira hanesan serbisu ne’ebé di’ak, Governu deside renova mandatu ba membru sira Diresaun AMRT nian.
Konsellu Ministrus aprova ona Rezolusaun Governu nian kona-ba rezerva atu defende Timor Gap - Timor Gás & Petróleu, E.P. nian iha konkursu públiku sira ba selebrasaun kontratu petrolíferu sira, nune’e sei rezerva interese partisipativu másimu ida porsentu ruanulu, iha kada kontratu atu fahe produsaun nian ne’ebé sei selebra iha ámbitu konkursu públiku sira ba Timor Gap, bazeia ba lejizlasaun ne’ebé vigora hela, no ne’ebé maka sei negosia kazu ba kazu entre Autoridade Nasionál Petróleu no Minerais (ANPM), investidór sira no Timor Gap.
Ministru Planeamentu no Investimentu Estratéjiku, Agio Pereira, no Komisaun Nasionál Aprovizionamentu, aprezenta proposta Deliberasaun rua, relasiona ho prosesu aprovizionamentu antesipadu no emenda kontratu nian hodi atualiza banda larga satélite. Proposta ne’e sei analiza fali iha sorumutuk Konsellu Ministrus nian tuirmai.
Konsellu Ministrus aprova ona proposta finál kona-ba Orsamentu Jerál Estadu nian ba tinan 2020, ho valór totál dolar amerikanu mil millaun 1,95, atu hatán ba nesesidade programa no prioridade nasionál ne’ebé define husi Governu Konstitusionál VIII. Husi valór ne’e, millaun 241,271 rezerva ba saláriu no vensimentu, millaun 738,428 rezerva ba beins no servisus, millaun 457,773 rezerva ba transferénsias públikas, millaun 53,267 rezerva ba kapitál menór no, ikus liu, millaun 459,260 rezerva ba kapitál dezenvolvimentu. REMATA
