Primeiru-Ministru, Taur Matan Ruak, no Prezidente Konferénsia Episkopál Timorense (KET), Dom Norberto do Amaral, Bispu Dioseze Maliana, ohin, loron 23 fulan-setembru, asina ona akordu ida-ne’ebé define atribuisaun, husi parte Governu nian, subvensaun públika ida ne’ebé korresponde ba valór hamutuk dolar amerikanu millaun sanulu ba tinan finanseiru 2019 nian hodi realiza atividade sira iha área edukativa, sosiál no governu ekleziál. Serimónia asinatura ne’e hala’o iha Auditóriu Xanana Gusmão, iha Ministériu Finansas nian, iha Dili.

Akordu ida-ne’e selebra bazeia ba konkordata ne’ebé asina ona iha loron 14 fulan-agostu tinan 2015, entre Repúblika Demokrátika Timor-Leste no Santa Sé, ne’ebé hatuur kuadru jurídiku kona-ba relasaun bilaterál sira entre Estadu rua ne’e no Akordu-Kuadru ne’ebé asina ona iha loron 16 fulan-jullu tinan 2017 entre Governu no KET. Akordu hirak-ne’e prevee kontribuisaun anuál ida, tuir disponibilidade finanseira Governu nian, ba atividade sira ho karakter sosiál, edukativu, no governu ekleziál Igreja Katólika nian. Valór no modalidade sira husi subvensaun ne’ebé atu fó, sei regula tinan-tinan ho akordu espesífiku sira entre Governu no Konferénsia Episkopál Timorense nian.

Akordu ne’ebé ohin asina ona ne’e prevee katak 50% husi valór subvensaun nian sei utiliza ba fim sira ho karakter edukativu, 25% atu uza ba atividade sira ho karakter sosiál, 15% atu uza ba atividade sira ho karater governu ekleziál no restu 10% atu uza ba jestaun kona-ba subvensaun ne’ebé fó ona.

Primeiru-Ministru, iha ninia intervensaun, rekoñese katak, “Igreja Katólika hala’o knaar importante ida durante Luta ba Libertasaun Nasionál nian” no “kontinua hala’o knaar fundamentál iha faze dezenvolvimentu nasionál nian oras ne’e, hodi presta ona ho kualidade servisu sira iha área edukasaun, saúde, apoiu ba ema sira kbiit-laek, vulneravel, no ema sira-ne’ebé la hetan atensaun”, “hodi bele ajuda iha área ka fatin barak iha país laran ne’ebé seidauk benefisia asesu tomak ba servisu públiku sira Estadu nian”.

Ukun-na’in ne’e mós aproveita “biban ida-ne’e atu fó valór ba obra edukativa, sosiál no ekleziál husi instituisaun atus ba atus ne’ebé namkari iha territóriu tomak, ne’ebé loroloron, ho sira-nia esforsu no dedikasaun tomak, kontribui nafatin ba misaun boot estratéjika Estadu nian ida-ne’e hodi forma sidadaun ne’ebé matenek, isin-di’ak, nakonu ho interese, ativu no partisipativu, hatene oinsá aproveita oportunidade sira no kontribui ba dezenvolvimentu nasaun, komunidade no sira-nia família ida-idak nian.”

Taur Matan Ruak hato’o mós ninia sentimentu triste ba falesimentu Padre João de Deus nian, ne’ebé hakotu iis horiseik, loron 22 fulan-setembru, ne’ebé “hela de’it nia obra no lembransa hanesan Bibi atan ne’ebé di’ak, domin-na’in no dedikadu ba nia bibi sira”.

Dom Norberto do Amaral agradese ba Governu nia atensaun ne’ebé fó ba Igreja Katólika no esforsu husi ekipa rua, husi Governu no husi KET, ne’ebé sai nu’udar responsavel ba diskusaun no preparasaun ba akordu ne’ebé asina daudaun ne’e.

Partisipa mós iha serimónia ne’e, Ministru Estadu Prezidénsia Konsellu Ministrus, Agio Pereira, Ministru Reforma Lejizlativa no Asuntus Parlamentares, Fidelis Manuel Leite Magalhães, Ministru Transportes no Komunikasoins, José Agustinho da Silva, Ministra Finansas iha ezersísiu, Sara Lobo Brites, Sekretária Estadu ba Igualdade no Inkluzaun, Maria José da Fonseca Monteiro de Jesus, Dom Virgílio do Carmo da Silva, Arsebispu Metropolitanu Provínsia Ekleziástika Dili nian, Enkarregadu Negósius Nunsiatura Apostólika, Monsignor Marco Sprizzi, Padre Juvito de Araújo, Padre Júlio Crispim no Padre Leandro Maria Alves.