Iha loron 6 fulan-setembru tinan 2019, hala’o serimónia atribuisaun sertifikadu ba formasaun lian portugés, iha ámbitu projetu Consultório da Língua Portuguesa para Jornalistas, iha auditóriu Prezidénsia Konsellu Ministrus, iha Palásiu Governu, iha Dili. Hosi programa ida-ne’e, formandu hamutuk 70 simu sertifikadu lian portugés nivel báziku no intermédiu.

Projetu ne’e maihosi parseria ida entre Camões, Instituto da Cooperação e da Língua no Sekretaria Estadu Komunikasaun Sosiál (SEKOMS) no ninia objetivu mak atu kapasita profisionál komunikasaun sosiál Timor-Leste nian sira atubele fó-sai informasaun ne’ebé fiar-belek ba públiku iha lian portugés, nune’e bele kontribui ba aumentu literasia mediátika, ekonómiku-finaseira no jurídika no ba promosaun populasaun nia koñesimentu jerál.

Sekretáriu Estadu ba Komunikasaun Sosiál, Merício Juvinal dos Reis “Akara”, elojia formandu sira ne’ebé partisipa iha kursu portugés ba jornalista sira no hetan sertifikadu ho susesu.

Sekretáriu Estadu agradese mós ba formadór sira hosi programa Consultório da Língua para Jornalistas (CLJ) ne’ebé ho esforsu no dedikasaun halo buat hotu ba projetu ne’e no ba formandu sira no agradese mós ba Camões, Instituto da Cooperação e da Língua tanba implementa no hala’o ho dedikasaun no profisionalizmu, liuhosi CLJ, kursu lian portugés ida-ne’e, ne’ebé kontribui ona ba informasaun ne’ebé di’ak iha lian portugés iha territóriu nasionál.

Embaixadór Portugál agradese ba disponibilidade konstante no amizade SEKOMS nian ba kooperasaun iha área komunikasaun sosiál, liuliu, iha profisiénsia iha domíniu di’ak lian portugés nian.

Prezidente Camões, Instituto de Cooperação e da Língua, Luís Faro Ramos, salienta importánsia hosi projetu Consultório da Língua para Jornalistas (CLJ) ba Timor-Leste tanba fó formasaun no profisiénsia iha lian portugés ba profisionál lubuk ida ne’ebé ezerse sira-nia atividade iha área ida-ne’ebé fundamentál ba nasaun, tantu iha nivel relasaun interna no mós esterna sira.

Tuir Luís Faro Ramos, projetu ne’e sei iha kontinuidade no hein hela prosesu reformulasaun no intervensaun bazeia ba Programa Estratéjiku Kooperasaun (PEC) tinan 2019-2023 entre nasaun rua.

Hosi formandu 70 ne’ebé simu sertifikadu, formandu na’in 20 simu sertifikadu nivel báziku A1 no A2, na’in 21 simu sertifikadu nivel B1 no na’in 29 simu sertifikadu nivel B2.

Serimónia ne’e konta ho prezensa husi Sekretáriu Estadu ba Komunikasaun sosiál, Merício Juvinal dos Reis “Akara”, Embaixadór Portugál iha Timor-Leste, José Pedro Machado Vieira, Prezidente Camões, Instituto da Cooperação e da Língua, Luís Faro Ramos no formandu no formadór sira hosi Consultório da Língua para Jornalistas.

Partisipa mós iha serimónia ne’e, diretór sira SEKOMS nian, adida ba área Kooperasaun Cristina Faustino, Diretora Servisu Kooperasaun Bilaterál Camões nian, Odete Serra no formandu no formadór sira hosi CLJ.