Governu Timor-Leste

Prezidénsia Konsellu Ministrus

VIII Governu Konstitusionál

...........................................................................................................................

Komunikadu Imprensa

Sorumutu Konsellu Ministrus iha Loron 31 fulan- jullu tinan 2019

Konsellu Ministrus hala’o sorumutuk iha Palásiu Governu, iha Dili no aprova ona proposta Dekretu Lei kona-ba Orgánika Ministériu Finansas nian, departamentu Governu nian ne’ebé sai nu’udar responsavel ba konsesaun, ezekusaun, koordenasaun no avaliasaun kona-ba polítika ne’ebé Konsellu Ministrus define no aprova ona ba área planeamentu no monitorizasaun anuál kona-ba orsamentu no finansas. Nune’e, Dekretu-Lei ida ne’e formula fila-fali estrutura orgánika Ministériu Finansas nian atubele hatán ba atribuisaun sira ne’ebé relasiona ho reforma fiskál, aduaneira, finansas públikas, jestaun finanseira no implementasaun husi polítika orsamentasaun tuir programa ne’ebé Lei Orgánika Governu Konstitusionál VIII nian atribui ona no nune’e mós reflete opsaun lejizlativa resente sira iha matéria planeamentu no finansiamentu públiku.

Ministra Finansas iha ezersísiu, Sara Lobo Freitas, aprezenta ona mós proposta Tetu Fiskál no prioridade nasionál sira ba Orsamentu Jerál Estadu (OJE) ba tinan 2020.

Proposta ne’e define área tolu ne’ebé sai prioridade ba atuasaun: dezenvolvimentu kapitál sosiál, ne’ebé haree liu ba edukasaun no formasaun, saúde no fornesimentu bee-moos no infraestrutura saneamentu báziku nian sira; dezenvolvimentu ekonómiku ne’ebé haree liu ba insentivu ba investimentu setór privadu nian, iha kriasaun empregu, iha diversifikasaun ekonómika no dezenvolvimentu setór agrikultura; no aumentu konetividade nasionál ho dezenvolvimentu portu, aeroportu, estrada rurál no estrada urbana sira no dezenvolvimentu lojístika nasionál ho kriasaun infraestrutura prosesamentu no armazenamentu nian sira no ho hadi’a transporte tasik (marítima), rai-maran (terrestre) no aéreu sira

Konsellu Ministrus define ona valór dolar amerikanu millaun 1,6 ba tetu fiskál OJE tinan 2020 nian.

Husi valór totál OJE tinan 2020, 30% sei aloka ba setór sosiál, ho aumentu ida iha edukasaun hamutuk 6% kompara ho OJE tinan 2019 no 19% OJE tinan 2018 nian, montante ba protesaun sosiál sei aumenta 1% kompara ho montante tinan 2019 no 9% kompara ho tinan 2018 nian, orsamentu ba setór saúde sei aumenta 39% kompara ho tinan anteriór, ho aumentu iha orsamentu ba Ministériu Saúde hamutuk 9% no 12% kompara ho orsamentu tinan 2019 no tinan 2018. Setór ekonómiku no setór infraestrutura sei reprezenta 41% husi totál OJE tinan 2020 nian, ho dolar millaun 654 maka sei aloka ba setór asuntu ekonómiku sira no millaun 13,5 ba dezenvolvimentu infraestrutura bee no saneamentu nian sira, orsamentu ba Ministériu Agrikultura no Peskas sei iha aumentu hamutuk  29% kompara ho orsamentu tinan 2019  no 153% ho orsamentu tinan 2018 nian.

Halo ona mós aprovasaun ba kalendáriu ba OJE ba tinan 2020, ne’ebé ninia aprovasaun iha Konsellu Ministrus, tuir previzaun, sei halo iha sorumutuk iha loron 27 fulan-setembru tinan 2019 nian no sei haruka ba Parlamentu Nasionál iha loron 15 fulan-outubru. Diskusaun, votasaun no promulgasaun sei hala’o iha fulan-dezembru oinmai.

Konsellu Ministrus aprova ona proposta Deliberasaun, ne’ebé Ministra Finansas iha ezersísiu aprezenta, kona-ba memorandu entendimentu entre Repúblika Demokrátika Timor-Leste no Repúblika Indonézia, kona-ba kooperasaun aduaneira no asisténsia mútua iha asuntu aduaneira nian. Memorandu ida-ne’e ninia objetivu mak atu promove kooperasaun entre nasaun rua hodi troka informasaun no fahe koñesimentu sira, atubele halo luta ne’ebé efetivu hasoru krime, liuliu krime tranznasionál no tráfiku sasán ilegál sira. Memorandu ne’e prevee mós komponente ida kona-ba dezenvolvimentu institusionál liuhusi atividade edukasaun no formasaun nian sira. Konsellu Ministrus fó podér tomak ba Diretór-Jerál Autoridade Aduaneira, José António Fátima Abílio, hodi asina memorandu ne’e.

Ikus liu, Konsellu Ministrus aprova ona naran lubun ida, ne’ebé inklui Estadu, individualidade no organizmu, hodi propoin ba Prezidente Repúblika atu bele fó kondekorasaun ho “Orden Timor-Leste nian” iha okaziaun selebrasaun aniversáriu ba dala 20 Konsulta Populár. “Orden Timor-Leste nian” maka kondekorasaun ne’ebé ho prestíjiu no dignidade nasaun nian ne’ebé boot liu hotu, ne’ebé kria iha tinan 2009 atu rekoñese no agradese ba timoroan no ema husi nasaun seluk, ne’ebé, ba sira-nia komportamentu ka hahalok ne’ebé maka sira pratika, iha kontributu signifikativu ida ne’ebé fó benefísiu ba nasaun ne’e, ba timoroan sira ka ba Umanidade. REMATA