Iha loron 22 fulan-jullu tinan 2019, Ministériu Saúde komemora ba dala tolu, Loron Nasionál Saúde nian ho nia tema “Lori Saúde ba ema hotu atu moris di’ak ho dignu” iha Sentru Konvensaun Dili.
Vise-Ministru ba Dezenvolvimentu Estratéjiku Saúde nian, Bonifácio Maucoli dos Reis, iha ninia diskursu, kongratula Ministériu Saúde ne’ebé maske hasoru difikuldade oin-oin konsege selebra loron importante ida-ne’e.
Vise-Ministru ne’e realsa katak loron 22 fulan-jullu hili hanesan Loron Nasionál Saúde nian, durante Governu Konstitusionál VI, tanba iha loron ne’e maka lansa programa “Saúde iha Família” iha tinan 2015, programa ida ne’ebé maka haruka ekipa médika sira ba uma-kain ida-idak iha territóriu laran tomak.
Vise-Ministru agradese ba esforsu Governu Konstitusionál VI nian ne’ebé lidera husi Rui Maria de Araújo no ninia membru sira hotu hodi determina loron importante ida-ne’e ba ita, iha ne’ebé ita festeja tinan-tinan hanesan loron Nasionál Saúde nian.
Atu hasa’e kualidade Saúde nian, Ministériu Saúde hetan mós apoiu husi kolaboradór sira husi Organizasaun Mundiál Saúde nian (OMS) iha Timor-Leste, GAVI, the vaccine alliance, UNICEF no Parseiru Dezenvolvimentu nian sira-seluk. Ho apoiu hotu-hotu nian, sei hala’o mós kampaña nasionál imunizasaun nian ida, no hein katak kampaña ne’e sei garante aumentu kobertura imunizasaun nian iha territóriu Timor-Leste nian tomak.
Vise-Ministru apela ba profisionál saúde nian sira hotu, atu serbisu hamutuk ho komunidade tanba ho nune’e de’it maka bele garante susesu programa ne’e nian no alkansa vizaun Ministériu Saúde nian atu garante populasaun ida ne’ebé saudavel, Timor-Leste ne’ebé saudavel.
Bonifácio Maucoli dos Reis afirma mós katak Ministériu Saúde hein katak selebrasaun loron ne’e nian sei haforsa profisionalizmu husi tékniku saúde nian sira atu ezerse sira-nia misaun iha komunidade nia leet”.
Eventu ne’e konta mós ho aprezentasaun ida husi eis-Primeiru-Ministru no eis-Ministru Saúde nian, Rui Maria de Araújo, kona-ba Kobertura Universál Saúde nian, ho objetivu atu estimula partisipasaun ida ne’ebé ativa husi sosiedade Timor nian iha saúde.
Serimónia ne’e konta mós ho prezensa husi deputadu balun, eis-titulár sira, Koordenadór Rezidente Nasoins Unidas nian iha Timor-Leste, reprezentante OMS nian iha Timor-Leste, reprezentante sira husi parseiru dezenvolvimentu nian sira-seluk, estrutura tomak Ministériu Saúde nian, Diretór sira husi Servisu Saúde Munisípiu nian sira (SSM), reprezentante sira husi PNTL, Prezidente Autoridade Munisípiu Dili nian no mós estudante sira.