Ministra Edukasaun, Juventude no Desportu (MEJD), Dulce de Jesus Soares, inaugura  iha loron 16 fulan-jullu tinan 2019, sala ekipadu ho komputadór iha eskola 5 de Maio, Becora, Díli. Aleinde ne’e lansa mós fatuk dahuluk ba konstrusaun ba sala aula  nian hamutuk rua.

“Agradese ba inan-aman husi estudante sira, komunidade edukativu ne’ebé kontribui hodi harii laboratóriu komputadór inklui sosa komputadór no konstrui sala ba aula,” dehan nia.

Ministra haktuir tan, “inan-aman sira halo sakrifísiu no kontribuisaun inan-aman sira nian ne’e bo’ot tebes atu apoiu alin sira bele aprende ho di’ak iha eskola. Tan ne’e, husu ba alin sira atu kuidadu didi’ak no valoriza inan-aman sira-nia esforsu, hatudu imi-nia dedikasaun, disiplina, respeita malu, foku ba estuda tanba inan-aman hakarak alin sira bele sai ema ne’ebé susesu iha futuru”.

Diretór Eskola 5 de Maio, Manuel Verdial, esplika, bainhira atu realiza obra ne’e, responsável hamutuk ho konsellu profesór sira hala’o enkontru ho inan-aman sira hodi fahe hanoin oinsá bele halo konstrusaun.

Tuir Diretór katak, inan-aman sira konkorda idea hirak ne’e tanba ho idea ne’e bele ajuda sira-nia oan bele aprende siénsia ho di’ak.

Rensponsavél ne’e informa mós katak, totál fundu ba rehabilitasaun sala komputadór, sosa komputadór 30 no meza ba komputadór ho total orsamentu $ 16.000.00. Fundus hirak  mai husi kontribuisaun inan-aman kada fulan ho montante $ 1.00 (dolar ida).

Partisipa iha serimónia ne’e, Sekretária Ezekutiva UNESCO iha Timor-Leste, Autoridade Polísia husi Eskuadra Postu Administrativu Kristu Rei, Administradór Postu Administrativu Kristu Rei, Diretór Nasionál Ensinu Sekundáriu Jerál, Diretór Nasionál Infraestrutura Eskolár, Diretór Edukasaun Munisípiu Díli, Superintendente Munisípiu Díli, Profesór sira, reprezentante inan-aman sira no mós estudante sira.