Vise-Ministru ba Dezenvolvimentu Estratéjiku Saúde,  Bonifácio Maucoli dos Reis ho Enkaregadu Interinu Negósiu Embaixada Repúblika Populár Xina iha Timor-Leste, Lei Zhen, asina nota entendementu kona- ba protokolu kooperasaun iha área saúde, iha Palásiu Sinzas, Caicoli Díli, loron 27 fulan-maiu tinan 2019.

“Ekipa  Brigada Médiku Xina  ne’e mak hanesan médiku espesialista  nain sia no tradutór  ida no kuziñeru ida,  hodi apoiu kuidadu  saúde tersiária  iha Hospitál Nasionál Guido Valadares (HNGV), aleinde ne’e apoiu mós  medikamentu, ambulánsia”, tenik Vise-Ministru.

Bonifácio Maukoli dos Reis esplika, médiku  espesialista sira ne’e mai atu fó prestasaun servisu ne’ebé  di’ak ba ita hotu, no sira sei servisu hamutuk ho médiku timor oan sira.

Iha misaun ne’e sira fó mós formasaun ba ita-nia médiku sira no bainhira sira-nia misaun hotu, ita prontu nafatin atu fó  atendimentu ba ita-nia komunidade sira.

Marka prezensa iha serimónia ne’e, Diretór Jerál Asuntu Billaterais Ministériu Negósiu Estranjeiru no Kooperasaun, Isílio Coelho, Diretór Nasionál, Diretór Jerál  Ministériu Saúde,  Ezekutivus, Reprezentante husi Organizasaun Mundial Saúde, Rajesh Pandav no  ekipa husi Brigada Médica Chinesa.