Ministériu Finansas, liuhosi Ministra Finansas iha Ezersísiu no atuál Vise-Ministra Finansas, Sara Lobo Brites, ohin 12 fulan-juñu tinan 2019 proposta kona-ba asisténsia tékniku hosi Banku Investimentu Europeu ba Governu Timor-Leste. Proposta ne’e aprezenta iha Sorumutuk Konsellu Ministrus nian, iha Palásiu Governu, iha Dili.

Banku Investimentu Europeu, instituisaun hosi Uniaun Europeia nian, ho natureza la’ós buka lukru, ho ninia sede iha Luxemburgu, ne’ebé maka fó empréstimu, garantia no presta asisténsia téknika no kapitál ba projetu emprezariál sira, hakarak fó apoiu ba Timor-Leste ba preparasaun projetu investimentu nian ne’ebé Governu hakarak atu implementa.

Akordu ida-ne’e hanesan apoiu tékniku iha implementasaun ba Ministériu sira, hanesan Ministériu Transportes no Komunikasoins (MTK), Ministériu Obras Públikas (MOP), Ministériu Saúde no Ministériu Edukasaun, ne’ebé maka hakarak halo estudu ba projetu balu ne’ebé aliña ho Planu Estratéjiku Dezenvolvimentu Nasionál (PEDN), no mós ho prioridade Governu nian sira.

“Banku Investimentu Europeia hakarak apoia euro millaun 5, hodi fó apoiu tékniku iha preparasaun projetu investimentu hirak ne’ebé maka Governu hakarak implementa” dehan Ministra Finansas iha Ezersísiu, Sara Lobo Brites, iha Palásiu Governu, hafoin aprezenta proposta refere iha Sorumutuk Konsellu Ministrus nian.

Konsellu Ministrus halo aprovasaun ba konteúdu tomak hosi akordu ne’e, antes tama iha faze konkordánsia hodi asina dokumentu refere molok haruka ba Bruxelas.