Sekretaria Estadu ba Komunikasaun Sosiál (SEKOMS), liuhusi Centro de Formação Técnica em Comunicação (CEFTEC), nu’udar embriaun ba Institutu Nasionál Formasaun Jornalista Timor-Leste (INFJTL), realiza ona Semináriu Internasionál ho tópiku “Formasaun Jornalista Timor-Leste: Enkuadramentu Legál, Kurríkulu no Dezafiu”. Semináriu ne’e hala’o iha loron 11 fulan-juñu 2019, iha Salaun Suai, Timor-Plaza, iha Dili.

Sekretáriu Estadu ba Komunikasaun Sosiál (SEKOMS), Merício Juvenal dos Reis “Akara” hateten katak, Semináriu Internasionál ne’e ninia objetivu mak atu halibur ideia, matenek no esperiénsia hosi matenek-na’in sira, ne’ebé mak iha esperiénsia iha área formasaun nian no iha dezenvolvimentu Instituisaun Jornalista nian, atubele hetan ideia ka referénsia di’ak, no ho hanoin katak sira-ne’e sai nu’udar parseiru importante atu bele dezenvolve Institutu Formasaun Jornalista iha ita-nia rain.

Iha tempu hanesan, Diretór CEFTEC, Luis Evaristo Soares, hateten katak Konstituisaun Repúblika Demokrátika Timor-Leste (RDTL) garante liberdade imprensa no liberdade ba meiu komunikasaun sosiál, inklui liberdade espresaun no liberdade ba kriasaun jornalista, liberdade ba asesu ba fonte informasaun nian sira, liberdade editoriál ba protesaun independénsia no sijilu (segredu) profisionál, no direitu kona-ba kriasaun jornál, publikasaun sira no meiu difuzaun nian seluk tan.  Tuir responsavel ne’e nia hanoin, Komunikasaun sosiál iha Timor-Leste konsidera hanesan sanak Estadu nian da-limak. Liberdade imprensa no Komunikasaun Sosiál hanesan parte importante ida hosi harii demokrasia.

Objetivu prinsipál hosi semináriu Internasionál ne’e mak atu halibur informasaun nu’udar referénsia hosi entidade relevante sira, liu-liu informasaun hirak ne’ebé iha relasaun ho aspetu oin-oin, hanesan perspetiva globál no perspetiva operasionál. Responsavel sira hein katak semináriu iha loron ne’e bele lori informasaun adekuada kona-ba kondisaun sira ne’ebé maka presiza ba estabelesimentu Institutu Formasaun Jornalista Timor-Leste nian.

Semináriu ne’e konta ho prezensa husi oradór sira hosi rai laran, hanesan Sekretáriu Estadu ba Komunikasaun Sosiál, Merício Akara; Prezidente Komisaun A Parlamentu Nasionál, Carmelita Caitano Moniz, Diretór INL, Dr. Benjamin Corte-Real, Prezidente Konsellu Imprensa, Virgílio da Silva Guterres, Akadémiku/Dosente, Pe. Martinho Gusmão, CEO STL, Salvador Ximenes, Prezidente TLPU, Francisco Simões Belo no Prezidente AJTL, David Hugo.

Iha semináriu ne’e partisipa mós oradór sira hosi rai-li’ur hanesan husi Indonézia no Portugál maka Priyambodo RH, Antigu Diretór Ezekutivu LPDS Jakarta-Indonézia, Chandra Kirana Prijosusilo, Akadémika no espesialista iha área estratéjia komunikasaun, Prof. Atmakusumah Atmadja, Antigu Prezidente Konsellu Imprensa Indonézia, Maria Isabel Sousa Ribeiro Silva, formadora hosi Sentru Formasaun Jurídika no Judisiária Timor-Leste no António Sampaio, hosi Ajénsia LUSA, Portugal.