Ministru Estadu Prezidénsia Konsellu Ministrus (PKM) no Ministru Planeamentu no Investimentu Estratéjiku (MPIE) Interinu, Agio Pereira, hala’o sorumutuk ho responsavel sira husi Komisaun Nasionál Aprovizionamentu (KNA), husi Ajénsia Dezenvolvimentu Nasionál (ADN) no husi Sekretariadu ba Projetu Boot sira (SGP, sigla iha lian portugés), no ho reprezentante sira husi Prezidénsia Konsellu Ministrus no husi Ministériu Planeamentu no Investimentu Estratéjiku, atu halo avaliasaun kona-ba pontu situasaun husi prosesu sira, kona-ba projetu infraestrutura 143 ne’ebé pendente hela hosi Governu Konstitusionál VI, atubele rezolve lalais. Sorumutuk ne’e hala’o iha loron 18 fulan-juñu, iha Palásiu Governu, iha Dili.

Projetu sira-ne’e hosi Governu sira liubá, refere ba obra infraestrutura nian sira ho karater urjente. Obra sira ne’e hatán ba situasaun emerjénsia no katástrofe naturál nian, no mós ba aumentu nesesáriu ba projetu sira ne’ebé eziste antes tiha ona, ne’ebé, haree ba situasaun ne’ebé iha, presiza duni atu rezolve lalais.

Nesesidade sira husi projetu sira-ne’e, Ministériu Obras Públikas, Transporte no Komunikasaun, Governu Konstitusionál VI nian maka identifika, no haruka prosesu sira ba pre-análize hosi Konsellu Administrasaun Fundu Infraestruturas (KAFI) no ba verifikasaun husi parte ADN nian. Prosesu sira-ne’e hetan ona konfirmasaun no aprovasaun hosi KAFI. Projetu sira-ne’e tama iha Orsamentu Jerál Estadu tinan 2018 no hetan aprovasaun husi Parlamentu Nasionál.

Hosi projetu 143 ne’e, besik rua baluk tolu (2/3) maka ninia serbisu hala’o ona parsialmente ka halo tomak, no ninia pagamentu sira halo ona sorin ka iha hela prosesu administrativu nia laran. Ba fali projetu sira seluk, barak liu maka iha hela faze ezekusaun obra.

Instituisaun governamentál sira sei prepara relatóriu integradu no detalladu ida ne’ebé sei inklui deskrisaun kona-ba nesesidade sira atu ezekuta projetu sira-ne’e no pontu situasaun husi projetu ida-idak, atu Konsellu Ministrus bele analiza prosesu ne’e no rezolve lalais tuir posibilidade, atu nune’e Estadu bele kumpre ninia obrigasaun sira ne’ebé estabelese ona, no kumpre objetivu sira husi Planu Estratéjiku Dezenvolvimentu (PED) tinan 2011-2030 no Programa hosi Governu Konstitusionál VIII nian, atu apoia emprezáriu nasionál sira, hodi dezenvolve ekonomia nasionál no promove empregu no kapasita setór privadu nasionál.

Aleinde Ministru Estadu, entidade sira ne’ebé partisipa mós iha sorumutuk ne’e maka Diretór-Jerál ADN, Samuel Marçal, Diretór-Jerál KNA, Aniceto do Rosário, Koordenadór SGP, Krispin Fernandes, asesór prinsipál sira husi MPIE, Gastão de Sousa, Pedro Lay no Santina Viegas Cardoso, no Diretór Nasionál no asesór jurídiku sira hosi PKM no MPIE.