Ministra Edukasaun Juventude no Desportu (MEJD), Dulce de Jesus Soares no  Sekretaria Ezekutiva komisaun Funsaun Publika (KFP), Maria de Jesus Sarmento, entrega Sertifikadu servisu ba funsionáriu administrasaun, professór  pensionista na’in 42 husi Ministériu MEJD, iha salaun INFORDEPE  Balide Díli, loron 2 fulan-maiu 2019.

Governante ne’e agradese ba benefisiáriu sira  ne’ebé fó sira-nia kontribuisaun, dedikasaun, sakrifisiu no esforsu tomak ba dezenvolvimentu edukasaun iha Timor-Leste.

“Profesór hirak ne’e balun hanorin tinan 20 resin ona hahú hosi tempu portugés, indonézia no to’o ukun rasik-aan, tan ne’e husu ita-boot sira-nia  kontribuisaun atu dezenvolve nafatin língua portuguesa iha eskola sira”, dehan Ministra.

 Sekretária Ezekutiva KFP esplika, prosesu ba reforma ne’e prosesu normál, Estadu rekoñese ba ita-bot sira-nia kontribuisaun durante  tinan barak no fó hanoin karak funsionáriu sira ne’ebé tama  ba iha reforma la’os obrigatorio.

 Reforma sira hamutuk 39 husi munisípiu 13 inklui mós  funsionarios na’in 3 husi nivel nasionál.

 Marka prezensa iha serimónia ne’e mak, Diretór Jerál, Diretór Nasionál no Diretór Munisipál sira husi MEJD.