Konsellu Ministrus aprova ona iha kuarta-feira, Loron 22 fulan-maiu, tinan 2019, ne’e rezolusaun ida-ne’ebé hato’o husi Ministru Reforma Lejizlativa no Asuntus Parlamentares kona-ba regra lejístika ne’ebé sei regula rekizitu hirak ne’ebé diploma foun sira governu nian ne’e sei halo tuir.

Objetivu husi regra lejístika sira ne’e atu kria padraun prosedimentu lejizlativu governu nian, ho regras komún ba ministériu hotu-hotu, hodi aumenta rigór iha preparasaun ba diploma legal foun no kualidade final sira-ne’e nian.

Tuir regra foun sira ne’e, molok atu tama iha prosesu lejizlativu, proposta foun ruma sira sei fó hatene kona-ba nesesidade atu halo lei foun ida, nomos efeitu ne’ebé hein atu hetan bainhira lei foun ne’e hetan aprovasaun. Tuir regra sira-nee proposta tenke inklui mós estudu ba impaktu husi diploma foun ne’e ba iha sosiedade no orsamentu Estadu nian.

Tuir ezijénsia ne’ebé maihusi regra foun sira ne’e, ba futuru proposta lejizlativa sira hotu tenke temi problema nasionál ida-ne’ebé lei buka buka atu rezolve nomos razaun hirak ne’ebé mak governu konsidera katak proposta lei ruma mak sai solusaun di’ak ba problema ne’e.

Objetivu husi Ministériu Reforma Lejizlativa no Asuntus Parlamentares ne’ebé Konsellu Ministrus aprova tiha ona, sai nu’udar ministériu sira bele rezolve problema sira ne’ebé eziste ho solusaun legál par ba ita-nia nasaun rasik, atu nune’e evita tuir de’it lejislasaun ne’ebé vigora iha nasaun seluk, tanba dala barak ne’e la par ba Timor-Leste.

“Rezolusaun ne’ebe foin aprova husi Konsellu Ministrus hanesan tulun tékniku ho detallu atu uza husi jurista sira administrasaun publika nian, maibé husi MRLAP no governu objektivu ne’e lolos mak ba futuro lei sira bele kualidade liu no par liu ho realidade rai ida-ne’e nian no ho nesesidade sidadaun sira nian”, Ministru Fidelis Magalhães dehan.

Rezolusaun ne’ebé aprova ona husi Konsellu Ministrus ho regra lejíztika foun sira ne’e inklui artigu 45 no aneksu haat. Aneksu hirak ne’e, kontein regra sira kona-ba avaliasaun impaktu husi diploma foun, liga ba proposta foun ho programa governu nian, iha indikasaun kona-ba lei antigu ne’ebé sei revoga (kansela), aleinde regra sira detallada, barak kona-ba estudu impaktu regulátoriu. Karik iha kazu kriasaun taxa foun sira entaun proposta mós presija tuir regra sira kona-ba justifikasaun ekonómika no finanseira ba taxa sira ne’ebé refere.