Ministru Estadu Prezidénsia Konsellu Ministrus no Ministru Koordenadór Asuntus Ekonómikus iha ezersísiu , Agio Pereira, hala’o sorumutuk ho responsavel sira hosi Pelican Paradise Group, Lda, iha loron 17 fulan-maiu tinan 2019, iha Palásiu Governu, Díli.

Sorumutuk ne’e ho objetivu atu debate Akordu Espesiál Investimentu nian entre Estadu Repúblika Demokrátika Timor-Leste ho Pelican Paradise Group, Lda, hodi dezenvolve kompleksu turístiku, ho investimentu ida-ne’ebé ho valór millaun 700 dólar amerikanu, iha área ida ho nia luan besik ektare 558, iha zona entre Tasitolu no Tibar, ne’ebé sei inklui unidade oteleira sira, kampu golf nian ida, lote rezidénsia sira, sentru dezenvolvimentu ida ba foin-sa’e sira, eskola internasionál ida, ospitál internasionál ida no sentru komersiál sira.

Kompleksu turístiku ida-ne’e sei permite harii postu traballu besik 1500, iha faze konstrusaun nian, postu traballu permanente 1300, hafoin konstrusaun, no sei permite mos halo reflorestasaun husi 80% área projetu nian.

Proposta Akordu Espesiál Investimentu ida ne’e sei analiza tuirfali hosi membru Governu sira, iha sorumutuk Konsellu Ministrus nian.