Ministru Defeza no Ministru Interiór interinu, Brigadeiru Jenerál, Filomeno da Paixão de Jesus, akompaña husi ninia komitiva, hala’o vizita dahuluk ba Postu Polísia Nasionál Timor-Leste (PNTL) no  Postu FALINTIL – Forsa Defeza Timor Leste (F-FDTL) nian sira iha Munisípiu Kovalima no Munisípiu Bobonaru, iha programa vizita Ministériu Defeza no Ministériu Interiór nian. Vizita traballu nian ida-ne’e hahú husi loron 25 to’o 27, fulan-abril 2019, no konta mós ho prezensa husi Komandante Interinu UPF, Superintendente Polísia,  João Sancho Pires.

Objetivu husi atividade vizita ne’e mak atu haree diretamente kondisaun no problema seguransa nian ne’ebé Postu PNTL no Postu F-FDTL nian hasoru.

Postu seguransa UPF nian hirak ne’ebé Ministru Defeza no Ministru Interior vizita iha Munisípiu Suai mak hanesan, Postu iha Salele, Mota-Masin, Tilomar-Wala Lama, Fatululik, Aikakar, Belulik Kraik, Belulik Leten, Fatumea, Aeroportu Suai no iha Munisípu Bobonaru nian nia vizita ba postu sira hanesan, Altu Lebos, Kompañia Alfa UPF, Kalohan-Saburai, Memo Kraik, Tunubibi, Nunura, Batugade, Badut Mean, Mota Ain inklui mós Postu F-FDTL nian iha Tunu Bibi, Derok Ren. Iha okaziaun ne’e vizita ba postu Ková nian mak la konsege hala’o, no hein fali ba vizita iha okaziaun tuirmai.

“Ha’u mai atu haree kondisaun uma sira ne’e nian. Balu di’ak hela maibé presiza mak manutensaun tanba uma barak naksobu ona no ida-ne’e ladi’ak. Uma balun di’ak, maibé ahi laiha, balun bee mak falta. Ha’u husu ona ba Xefe Gabinete Ministériu Interiór nian atu aponta hotu, atu nune’e bele tau iha planu ba 2020, hodi nune’e itabele hadi’a fali postu sira ne’e”, dehan Ministru ne’e ba jornalista sira bainhira hala’o vizita ba iha Postu Administrativu Fatumea, Munsípiu Suai iha loron 25 fulan-abríl tinan 2019.

Governante ne’e mós hatán ba preokupasaun balun husi komunidade ne’ebé husu ba Governu atu bele hadi’a estrada, kondisaun uma no transporte nian, atubele fasilita atividade membru UPF sira nian no atubele garante seguransa iha fronteira entre nasaun rua ne’e.

Durante vizita traballu ne’e, Filomeno da Paixão de Jesus, observa diretamente atividade unidade (UPF) nian, haree mós sira-nia fatin toba, hariis-fatin, eletrisidade, bee no mós fatin te’in nian. Kona-ba kestaun instalasaun nian, Ministru sei tau iha planu ba tinan oin.