Vise-Ministra ba Kuidadus Saúde Primárius, Elia A.A .dos Reis Amaral, akompaña husi Prezidente da Komisaun Funsaun Públika, Faustino Cardoso no Diretor Ezekutivu Ospital Nasional Guido Valadares (HNGV), Aniceto Barreto, fó posse ba xefe  departamentu foun sira  husi HNGV, iha loron 16 fulan-abril, tinan 2019.

Serimónia ne’e bazeia ba programa 2018-2023 no Planu Estratejiku Nasional ba Setór Saúde 2011-2023 nu’udar pasu dahuluk ministériu Saúde nian husi VIII Governu Konstitusionál.

Vise-Ministra realsa katak papel Ministériu Saúde maka oinsá atu asegura no fortifika sistema nasionál saúde iha nivel hotu ba estabelesimentu kuidadu saúde hanesan HNGV, Rejionál munisípiu, sentru saúde, postu saúde, SISCA no saúde Familia.

“Profisionál saúde sira iha HNGV hahú husi Médiku, Enfermeiru, Parteira, Tekniku Aliadu sira Administrasaun no Finansas no tekniku sira hotu, atu servisu ho profesionalizmu, digno ho kualidade”, Apela Elia Amaral.

Ministra Saúde sente orgullu tanba totál husi emposadu na’in 17, feto na’in 12 no mane na’in 5, ne’e signifika katak emansipasaun feto profisionál saúde durante prosesu selesaun no hatudu iha ekuidade no balansu ba jéneru.

Iha nia intervensaun Prezidente Komisaun Funsaun Públika husu ba emposadu sira atu servisu ho responsabilidade no oinsá bele implementa mensajen ida ne’e iha pratika servisu lor-loron tuir situasaun grau responsabilidade ida-idak nia.