Ministru Defeza no Ministru Interior Interinu, Brigadeiru Jenerál (Ref), Filomeno da Paixão de Jesus, iha Tersa-Feira, loron 12 fulan Marsu tinan 2019, informa dezenvolvimentu FALINTIL-Forsa Defeza Timor Leste (F-FDTL) ho Polísia Nasionál Timor Leste (PNTL) nian ba Prezidente Repúblika, Dr. Francisco Guterres Lú-Olo.

“Ohin ha’u mai ko’alia liu kona-bá reforma iha F-FDTL ho PNTL ita haree konseitu estratéjia 2016 hateten polísia agora sei komunitária la’ós polísia Robusta, ida ne’e mak ohin ko’alia fiksu ho Prezidente Repúblika polítika ida ne’e mak sei hala’o ba oin, nune’e mós ho revizaun sira uluk ha’u temi ona nivel estratéjia militár no ba polísia nian, “dehan Ministru ba jornalista sira bainhira hato’o relatóriu Serbisu nian ba Prezidente Repúblika iha knaar fatin, Palásiu Prezidensiál Bairo-Pite.

Iha biban ne’e mós, Ministru relata kona-bá autoridade marítima ne’ebé sei envolve ministériu relevante sira relasiona ho kestaun tasi no seguransa marítima nian.

Tuir Ministru, autoridade marítima refere sei submete ba iha estrutura Ministériu Defeza nian.

“Tuir planu sei tau brigadeiru ida hodi haree kona-bá dezenvolvimentu marítima nian no iha tinan ida ne’e sei halo instalasaun ba ninia eskritóriu iha defeza, “tenik Brigadeiru Jenerál Ref ne’e.

Kestiona kona-ba pakote kandidatura ba komandante jerál PNTL nian, Ministru Defeza no Ministru Interior Interinu hateten, nia parte simu ona pakote kandidatura rua maibé sei deside de’it ida atu lori ba konsellu Ministru.

 “Ha’u tenke tetu didi’ak haree fila fali sira nia lista iha polísia Ida ne’ebé prienxe duni kondisaun atu bele sai Komisáriu ida ne’e mak ha’u bele lori ba leten ha’u lori pakote ida de’it labele rua, “dehan Ministru.

Ministru Defeza ne’e hatutan, kandidatu komandante jerál tenke asume ona diviza superintendente Xefe, hasai kursu pelumenus iha defeza no seguransa no hatene konseitu defeza no segurança.