Ministru Defeza no Ministru Interior Interinu, Brigadeiru Jenerál (Ref), Filomeno da Paixão de Jesus ho Sekretáriu Estadu Juventude no Desportu (SEJD), Nelio Isaac Sarmento, akompaña hosi Komandante Jerál Polísia Nasionál Timor-Leste (PNTL), Komisáriu Faustino da Costa, iha loron 14 fulan-marsu tinan 2019 hasoru malu ho Komisaun B Parlamentu Nasionál ne’ebé trata asuntu defeza no Seguransa hodi esplika kona-bá situasaun grupu artemarsiais (GAM) iha Timor-Leste.

Ministru Defeza no Ministru Interior Interinu, Brigadeiru Jenerál (Ref), Filomeno da Paixão de Jesus, hateten komisaun B hakarak rona esplikasaun detallu husi Komisaun Reguladóra Arte Marsiais (KRAM), ho Ministériu Interior no Ministériu Defeza kona-bá seguransa iha Dili no munisípiu relasiona ho atividade grupu arte marsiais ne’ebé kria instabilidade.

 “Kona-bá atu reativa fila-fali GAM sei haree ba lei no GAM sira ne’ebé taka ona sira-nia asaun durante ne’e sei tetu tanba ne’e sei kleur la’ós desizaun atu halo lalais” dehan Ministru Defeza ba jornalista sira bainhira hala’o enkontru iha Parlamentu Nasionál.

Brigadeiru jenerál, Filomeno da Paixão de Jesus, hatutan nia parte iha ona planu atu hari ekipa task force ida hodi halo estudu no identifikasaun antes hato’o rekomendasaun ba governu liuhusi konsellu ministru hodi foti desizaun finál.

Iha biban ne’e mós, Komandante Jerál informa kona-bá atuasaun husi autoridade seguransa hasoru elementu GAM sira ne’ebé komete krime.

Iha fatin hanesan, Prezidente Komisaun B, Adérito Hugo, hateten parlamentu nasionál bolu komisaun KRAM atu informa ba deputadu sira kona-bá serbisu komisaun ne’e nian ne’ebé eziste ona durante tinan 10, inklui desizaun governu anterior hodi hapara atividade GAM balun no ezije GAM ne’ebé la-hetan proibisaun atu prenxe rekizitu sira tuir lei númeru 5/2017.

Prezidente Komisaun B mós apresia aprezentasaun relatóriu husi GAM ne’ebé ne’ebé di’ak no detallada, maibé sei enfrenta problema balun, liu-liu kondisaun serbisu ne’ebé la-favoravel. Aleinde ne’e GAM mós hala’o serbisu ho di’ak no kumpre regra sira ne’ebé estabelese.

Kona-ba reativa fila-fali GAM tolu ne’ebé taka tiha ona, governu estabelese ona regime ne’ebé hahú vigora iha tinan 2009 too 2017 atu regula organizasaun arte marsiais ne’ebé sidauk prienxe rekizitu no halo rejistu legal.