Sekretáriu Estadu Ambiente (SEMA), Demétrio de Amaral de Carvalho, entrega ofisialmente livriñu protesaun no konservasaun dugong (karau tasi) no du’ut tasi, ba Ministra Edukasaun, Juventude no Desportu (MEJD), Dulce de Jesus Soares, iha salaun eskola ensinu báziku filial Nu’u-Laran, Bairo dos Grilos, Díli (11/04/19).

Ministra Dulce de Jesus Soares, agredese ba Sekretáriu Estadu Ambiente ne’ebé servisu hamutuk interministeriál hodi produz ona livriñu tuir ministériu nia nesesidade iha prosesu apredizajen nian.

“Livruñu ida ne’e importante no la’os rai de’it iha bilbioteka eskola nia maibé uza ho loloos tuir ninia funsaun, Hanesan referénsia ba estudante sira atu imprensta no lee, nune’e sira bele komprende no iha koñesimentu kona-ba importánsia ba proteje ita-nia rikusoin tasi nian.” hateten Ministra.

Sekretáriu Estadu, esplika, bele uza livru ne’e hodi halo sensiblizasaun kona-ba dugon ka karau tasi ne’ebé ameasadu iha mundu,

“Timor-Leste hanesan abitat ida exelente ba dugon, tanba ne’e ita esforsu hamutuk harii karaktér sosiedade ida ne’ebé bele habali ita-nia ambiente hodi proteje espesie ida ne’e, ne’ebé mak la’ós de’it importante prespektiva hosi biodiversidade nian maibé mós bele sai atrasaun turístika hodi kontribui dezenvolvimentu ekonómiku Timor-Leste nian”. Akresenta Ministra

Partisipa iha serimónia ne’e, diretór jerál no nasionál hosi instituisaun rua ne’e, no diretór eskola ensinu báziku no sekundáriu iha Dili laran.