Sekretáriu Estadu Formasaun Profisionál no Empregu (SEFOPE) Julião da Silva iha loron 03 abril 2019 hala’o koferensia de imprensa  relasiona ho vijita ba iha Japaun no MOU ne’ebé asina entre Governu Repúblika Demkratika Timor-Leste liuhusi SEFOPE ho Governu Austrália kona-ba programa PLS foin lalais ne’e.

Objektivu vijita ba iha japaun oinsa maka atu bele hetan oportunidade hodi haruka jovens timorenses ba aprende hodi eleva sira nia koñesimentu no kapasidade dia’ak liu tan, no mós bele hetan oportunidade servisu.

Governu Japaun iha inisiativa positivu hakarak  involve nasaun Timor-Leste iha oportunidade ne’ebé haruka jovens sira ba servisu, areas ne’ebé Governu ne’e fó iha sanulu resin ha’at, maibe Governu Timor-Leste liu husi SEFOPE sei hare no identifika areas ida ne’ebé maka nasaun Timor-Leste bele partisipa.

Programa ne’ebé atu haruka Joves sira ba servisu iha Japaun sei presiza tuir kursu, tan ne’e husu ba jovens sira atu hakbesik a’an ba sentru formasaun sira ne’ebé maka besik no hetan ona akreditasaun husi instituisaun autónomu INDMO ne’ebé tutela iha SEFOPE hodi nune’e bele hasa’e koinesimentu di’ak liu tan atu bele kompete ho nasaun sira seluk iha programa ne’e.

Governante ne’e hateten espera iha tempu badak bele asina ona MOU ho Governu Japaun, tan ne’e Governu Timor-Leste liuhusi SEFOPE sei hanoin hodi halo estudu komparativu ba iha nasaun Indonesia ne’ebé involve ona iha programa haruka traballadór ba iha Japaun desde tinan 1993, hodi bele garantia maun de obra ho kualifikadu.