Ministru Negósius Estranjeirus no Kooperasaun iha ezersísiu, Agio Pereira, no Ministru Interiór iha ezersísiu, Alexandrino de Araújo, iha loron-sesta, 29 fulan-marsu, simu Embaixadór Xina nian ba Timor-Leste, Xiao Jianguo, iha Palásiu Governu, iha Dili.

Sorumutuk ne’e hala’o hafoin ema oho Tan Lin Xue, médiku xinés,  iha loron-segunda madrugada, iha Dili. Objetivu husi sorumutuk ida-ne’e atu garante koordenasaun ne’ebé efikás entre instituisaun Estadu nian hotu-hotu ho Embaixada Xina nian iha Timor-Leste, kona-ba asuntu ne’e.

Ministru Negósius Estranjeirus no Kooperasaun iha ezersísiu ne’e garante katak “instituisaun nasionál sira halo hela esforsu hotu-hotu ne’ebé sira bele halo hodi rezolve kazu ida ne’e”.

Embaixadór Xina nian aproveita ”biban ne’e hodi hafoun ninia konsiderasaun ne’ebé aas tebes ba Polísia Nasionál”.