Ministru Reforma Lejizlativa no Asuntus Parlamentares, Fidelis Manuel Leite Magalhães, konfirma ona, iha loron 25 fulan-marsu, ninia partisipasaun iha semináriu nasionál atu hanoin filafali kona-ba vítima sira husi masakre Likisá nian, ne’ebé akontese iha loron 6 fulan-abríl tinan 1999.

Semináriu ida-ne’e ninia tema maka “Dalan Naruk ba Justisa” no tama iha ámbitu komemorasaun aniversáriu daruanuluk masakre Likisá nian.

Masakre Likisá ne’e akontese fulan lima molok referendu, ne’ebé hala’o iha loron 30 fulan-agostu tinan 1999, no ne’ebé lori Timor-Leste ukun rasik an. Iha loron 6 fulan-abríl kuaze ema rihun rua maka subar iha igreja Likisá, hafoin soldadu no milísia pró-indonézia sira sunu no harahun uma sira iha munisípiu ne’e. Nune’e, igreja ne’e sai nu’udar alvu husi atake milísia sira nian no entre ema na’in 30 to’o 100 maka mate. Masakre Likisá nian sai nu’udar atake dahuluk iha ne’ebé milísia sira invade igreja ida, fatin ne’ebé, iha tempu ne’ebá, ema konsidera hanesan fatin ne’ebé seguru liu.

Reprezentante sira husi komisaun organizadora fó hatene ba Ministru Reforma Lejizlativa no Asuntus Parlamentares katak eventu ne’e sei sai hanesan oportunidade ida ba populasaun Likisá no ba konvidadu sira hotu husi munisípiu sira seluk atu hanoin filafali kona-ba nasaun nia dalan husi kedas loron libertasaun nasionál.

Viseprezidente komisaun organizadora ba komemorasaun masakre Likisá nian, Lucas Soares, hatete katak “Ita la’ós vítima, tanba povu asume ona libertasaun nasionál, maibé ita tenke hanoin filafali kona-ba dalan husi tinan 20 ikus nian no kona-ba dalan naruk ba justisa”.