Sekretáriu Estadu Komunikasaun Sosiál (SEKOMS), Merício Juvinal dos Reis “Akara”, segunda ne’e 11/03/19, iha auditóriu Prezidénsia Konsellu Ministru nian, loke kursu Kualifikasaun Nasionál iha komunikasaun no media ba setór públiku ho sertifikadu nivel IV-INDIMO (Institutu Nasionál Dezenvolvimentu Mão de Obra) ho formasaun ba Komunikasaun no Teknólojia no Informasaun foun ba setór públiku no privadu sira.

Sentru Formasaun Téknika iha Comunicação (CEFTEC) maka dezenvolve kursu hirak-ne’e no sei hala’o too fulan outubru 2019. Módulu rua dahuluk formasaun nian iha durasaun oras 80 no sei haree liu ba oinsá Hakerek Inprensa no Komunikasaun, Relasaun Públika no Protokolu.

Iha ámbitu formasaun ne’e mós sei hanorin módulu iha área hirak hanesan Rádiu, Televizaun, Multimédia, fotografia dijital, dezeñu gráfiku, lian portugés no lian tetun.

Sekretáriu Estadu, Merício Akara, hateten katak objetivu hosi formasaun ne’e atu kapasita no hasa’e koñesimentu funsionáriu sira iha liña ministeriál ho kualidade pratika iha hakerek imprensa, relasaun públika no protokolu hodi garante ninia kualidade servisu tuir duni padraun INDIMO nian.

“Estado fó ona oportunidade ba partisipante sira atu tuir formasaun no partisipante sira mós tenke uza tempu ho disiplina” ,

Aleinde ne’e SEKOMS mós elojia formadór sira iha CEFTEC tanba bele fó formasaun no fahe esperiénsia la’ós de’it teoria maibé mós partika”, tenik Merício.

Diretór CEFTEC, Luis Evaristo Soares, haktuir katak, formasaun ne’e dedika tomak ba funsionáriu sira ne’ebé mai husi liña ministeriál sira ho ninia implikasaun pozitivu ba sira-nia servisu rasik.

Formasaun ba área hakerek imprensa feto hamutuk na’in 12 no mane na’in 4, iha área relasaun públika no protokolu nian feto hamutuk 13 no mane na’in 6.