Sekretáriu Estadu Formasaun Profisionál no Empregu, Julião da Silva, iha loron 28 fulan-fevereiru tinan 2019 partisipa ona iha serimónia despedida ba timoroan na’in-136 ne’ebé ba serbisu iha Koreia Súl.

Traballadór na’in-97 ne’e sei servisu iha área peska nian no na’in-36 iha área indústria, no, tuir planu, traballadór sira ne’e foin arranka ba iha loron 12 fulan-marsu ne’e.

Sekretáriu Estadu ne’e husu ba traballadór sira “atu labele envolve iha kualkér atu kriminozu no, karik akontese ida-ne’e, maka sei dada-sai husi programa ne’e no sei laiha tan biban atubele ba servisu iha rai-li’ur”.

“Julião da Silva husu mós ba traballadór sira ne’ebé bá estranjeiru atu hatudu “étika, responsabilidade no badinas iha sira-nia servisu tanba sira reprezenta nasaun no povu timoroan”.

Sekretáriu Estadu ne’e agradese mós ba Governu Koreia-du-Súl, liuhosi Embaixadór Koreia-du-Súl nian iha Timor-Leste, “esforsu boot hodi haruka traballadór timoroan sira hodi ba servisu iha Koreia, no fó dalan hodi hamenus dezempregu iha rai-laran”.