Projeto Mais Português finansia hosi Gabinete Apoiu ba Sosiedade Sivil hosi Gabinete Primeiru-Ministru nian (GASC-GPM) apoia ida hodi halo parseria bilateral entre Fundasaun Oriente no FONGTIL (plataforma hosi Organizasaun naun Governamentál sira (ONGs) timor nian). Projetu ida-ne’e nia objetivu maka halo divulgasaun kona-ba istória no identidade Timor-Leste nian ne’ebé integra iha kultura luzófonu liuhosi lian ofisiál ida maka lian portugés, hodi hakbiit liután partisipante sira nia koñesimentu linguístiku iha área oioin liuhosi inisiativa ne’ebé kursu ne’e sei oferese. Nune’e, projetu ne’e sei fó inisitativa kulturál oioin no lúdiku-pedagójiku no ida maka lian portugés.

Ne’e duni, tuir pedidu Diretór Estabelesimentu Prizionál Bekora nian maka sei hala’o kursu lian portugés ba dadur-nain hamutuk 54, inisiativa ida ne’ebé, iha futuru mai sei hala’o mós iha estabelesimentu prizionál seluk iha Timor-Leste. Inaugurasaun ba kursu ne’e hala’o ona iha loron-14 fulan fevereiru tuku 9 no marka prezensa iha serimónia ne’e maka Ministru Justisa, embaisadór Portugal nian iha Timor-Leste, Koordenadór hosi GASC-GPM, Diretora Jerál hosi Ministériu Justisa, Diretór hosi Servisu Prizionál, Delegada hosi Fundasaun Oriente, reprezentante FONGTIL no sai nuudar anfitriaun maka Diretór hosi esatabelesimentu prizionál Bekora.

Ministru Justisa, Manuel Cárceres da Costa, defende katak ‘’ lian portugés sei ajuda dadur sira atu prepara-an diakliu ba futuru, hafoin sira livre’’. No José Pedro Machado Vieira, embaisadór Portugal, hatutan mós katak ‘’ edukasaun nuudar feramenta ida importante tebtebes iha prosesu reintegrasaun sosiál nomós nuudar meiu esensiál ida atu kapasita ema hodi ezerse direitu universál seluk ne’ebé hanesan’’.