Prezidente no Membru Konsellu Administrasaun Institutu Nasionál Seguransa Sosiál – INSS simu ona tomada posse hodi bele dirije no jere servisu iha área Seguransa Sosiál nian. Serimónia refere hala’o iha Edifísiu Sentrál MSSI-Kaikoli-Díli, Loron Tersa-Feira, (22/01/2019).

Sira-nain hirak ne’e mak hanesan, Longuinhos Armando (Prezidente INSS), Cornelio Barros, Azavedo Marcal, Alberto Carvalho Araújo no Romalho da Costa.

Hafoin tomada posse, Ministra Solidariedade Sosiál no Inkluzaun, Armanda Berta dos Santos hateten, Bazeia ba Rezolusaun Governu N.º 24/2018 nian, ohin hala’o tomada posse ba Prezidente no membru sira Konsellu Administrasaun Institutu Nasionál Seguransa Sosiál atu bele hala’o servisu hodi Instituisaun refere funsiona hahú ohin ba oin.

Ministra husu mós ba Prezidente ho nia membru sira atu bele servisu ho seriedade no integridade ba ita-nia komunidade sira, liu-liu ba benefisiáriu sira. Membrus hirak ne’e, ida mai hosi traballadór sira, CCITL, Sindikatu no ida seluk mai hosi governu rasik hodi sai hanesan pontu fokál atu bele haree servisu seguransa sosiál nian.

Entretantu, Prezidente Institutu Nasionál Seguransa Sosiál, Longuinhos Armando hateten, “hanesan Timor-oan ha’u orgullu no ida ne’e hanesan priviléjiu boot ida mai ha’u hodi dirije instituisaun boot ida-ne’e, ha’u agradese ba governu liuhosi MSSI ne’ebé bele fó fiar mai ha’u atu bele jere instituisaun ida-ne’e durante tinan 3 nia laran”.

Hanesan Timor-oan mós hakarak servisu hamutuk oinsá mak instituisaun ida-ne’e bele la’o ho di’ak, tanba instituisaun ida-ne’e hamriik atu fó garantia ba traballadór sira, liu-liu funsionáriu públiku sira no privadu sira nia vida ba aban bainrua nian.

Prezidente INSS realsa liután, Planu prioridade sira ne’ebé mak iha tempu badak atu hala’o maka, sei nomeia uluk lai diretór ezekutivu, tuir mai sei sosializa instituisaun ida ne’e ba iha territóriu tomak, tanba ita-nia funsionáriu barak mak seidauk kompriende didi’ak bainhira ko’a sira-nia osan. Ho nune’e ami sei kria sistema ida no kria fasilidade ba benefisiáriu sira atu, nune’e, sira bele hatene loloos sira-nia direitu no devere sira.

Funsionáriu sira ne’ebé agora servisu iha instituisaun ne’e hamutuk 33 inklui asessór na’in 2. Funsionariu sira ne’e tuir planu sei destaka de’it ba instituisaun ida ne’e atu bele kontinua hala’o servisu, esplika Prezidente INSS.

Partisipa iha seremónia ne’e mak hanesan, Membrus Governu, Reprezentante Parlamentu Nasionál, Reprezentante Komisaun Funsaun Públiku, Diretór Jerál MSSI, Diretóres Nasionais no Munisipais, Xefe Departamentus, Padre no Madre sira, inklui mós setór privadu sira.