Ministru Reforma Lejislativa no Asuntus Parlamentares, Fidelis Manuel Leite Magalhães, fό posse iha sesta-feira (18/01), ba prezidente foun Rádiu no Televizaun Timor-Leste (RTTL), Fransisco da Silva Gary, ba periodu 2019-2024.

Iha nia diskursu Ministru hateten katak husi parte governu nian sei respeita nafatin instituisaun nia independénsia. Hanesan parseiru importante ida atu ita hotu bele servisu hamutuk ba oin hodi atinje objetivu dezenvolvimentu nian.

“País ida sei la dezenvolve wainhira laiha orgaun komunikasaun sosiál ida ne’ebé profisionál. Tanba meios ne’ebé fasil no di’ak liu atu hametin integridade nasionál, unidade nasionál, dezenvolvimentu no edukasaun mak liu hosi meios komunikasaun sosiál.

Iha tempu hanesan Prezidente emposadu hato’o nia apresisaun profunda ba servisu oi-oin ne’ebé parte hotu-hotu halo ona atu RTTL,EP kumpre ninia misaun hodi sai Roman ba Nasaun.

Iha biban ne’e Prezidente hakarak konvida dirijente no funsionáriu sira, espesialmente jornalista sira atu kaer-metin dixiplina, dedikasaun no profisionalizmu hodi fornese informasaun ne’ebé di’ak liu ba povo doben Timor-Leste no ba mundo.

Serimόnia ne’e konta ho prezensa hosi husi Ministru Obras Públikas, Salvador Soares dos Reis Pires, Ministru Transportes no Komunikasoins José Agustinho da Silva, Secretáriu Estadu ba Komunikasaun Sosiál, Mericio Juvenal dos Reis “Akara”, Embaixadόr Portugal iha Timor-Leste, José Pedro Machado Vieira, Prezidente Komisaun Funsaun Públika, Faustino Cardoso, Presidente Ajénsia Notisioza Timor-Leste – TATOLI, José da Costa, no mós deputadu balun hosi Parlamentu Nasionál no reprezentante hosi funsionáriu interligado husi ministériu sira balun.