Sekretáriu Estadu Formasaun Profisionál no Empregu (SEFOPE), Julião da Silva asina ona, ho empreza husi Xina, Yuan Long Ping High-Tech Agriculture Development Co.Ltd., Memorandu Entendimentu (MdE) ida kona-ba hakiak boek, iha loron 4 fulan-dezembru tinan 2018, iha Postu Administrativu Hatu-Udu, Munisípiu Ainaru.

Julião da Silva, lori Governu Timor-Leste nia naran hato’o agradesimentu ba kontribuisaun empreza Long Ping nian, liuhusi projetu ida-ne’e, ba kriasaun kampu serbisu ba timoroan sira. Ida-ne’e hanesan kontributu importante ida hodi atinje kompromisu Governu Konstitusionál VIII nian, atu kria kampu serbisu hamutuk 60.000 ba timoroan sira kada tinan.

Sekretáriu Estadu ne’e mós hatutan katak, Governu Konstituisionál VIII, liuhusi SEFOPE, iha ona planu atu fó formasaun ba foin-sa’e sira, hodi nune’e hadi’a sira-nia kapasidade, atubele garante kualidade rekursu umanu ne’ebé bele hetan serbisu husi emprezáriu sira ne’ebé maka sei investe iha ita-nia nasaun, hanesan empreza Long Ping.

Hafoin asina MdU ne’e, Sekretáriu Estadu ho ninia komitiva hala’o mós vizita ba Sentru Formasaun ida, ne’ebé madre sira maka harii iha Munisípiu Ainaru, Postu Administrativu Ainaru ne’ebé fó formasaun ba foin-sa’e sira iha área administrasaun nian. Julião da Silva hala’o mós vizita ba restaurante ida ne’ebé harii ho apoiu husi SEFOPE, atubele haree rasik problema sira ne’ebé maka restaurante ne’e hasoru.