Parlamentu Nasionál aprova ona, ohin, loron 12 fulan-dezembru tinan 2018, Orsamentu Jerál Estadu nian (OJE) ba tinan 2019, ho votu afavór 40, kontra 25 no abstensaun zero. Tuirmai sei halo diskusaun no votasaun iha espesialidade ne’ebé, tuir Rejimentu Parlamentu Nasionál nian, labele liu loron 10.

Hafoin remata diskusaun no votasaun ba artigu hotu-hotu husi proposta lei ne’e, sei hala’o votasaun finál globál kona-ba testu ho alterasaun sira ne’ebé aprova ona. Nune’e, dokumentu finál, Lei Orsamentu Jerál Estadu nian ba tinan 2019 nian, sei haruka ba Prezidente Repúblika, hodi halo promulgasaun.

Primeiru-Ministru, Taur Matan Ruak, iha ninia intervensaun iha debate jeneralidade ne’e nia rohan, hateten klaru katak orsamentu ida-ne’e “fundamentál ba nasaun no ba povu” no “marka fin husi períodu inserteza ida” ho siklu foun ida husi estabilidade finanseira no ekonómika.

OJE ba tinan 2019 ne’e ninia montante totál maka dolar amerikanu millaun $ 1.827 hodi taka despeza husi órgaun, departamentu no instituisaun Estadu nian hotu-hotu, dolar amerikanu millaun $87 ba projetu ne’ebé finansia ho empréstimu no dolar amerikanu millaun $162,6 maihusi Parseiru Dezenvolvimentu nian sira.

Atu lee diskursu Primeiru-Ministru nian iha aprezentasaun OJE tinan 2019, klike iha ne’e.