Deklarasaun Porta-vóz IV Governu Konstitusional iha 14 Janeiru 2010
Sekretáriu Estadu Konselhu Ministrus
no Porta-Vóz Ofisiál Governu Timór-Leste
Díli, 14 Janeiru, 2010
Governu la sekunda Sino Green Land ni asersoens ka supozisoens iha deklarasaun ba média
Governu hakfodak ho deklarasaun media ne’ebé fahe barabarak ona husi kompanhia ida naran Sino Green Land. La iha membru Governu nian ida mak apoia, sekunda, tulun ka aprova kualkér akordu kooperasaun ida ho Sino Green Land hamutuk ho ‘reprezentantes lokais’, ne’ebé dehan katak halo parte membrus setór privadu, atu halo importasaun produtus freskus.
Nune’e mós, la iha produtus hanesan hirak ne’ebé alista iha komunikadu imprensa ne’ebé Sino Green Land halo, mak bele husik tama iha Nasaun ne’e; tanba Timór-Leste iha leis/regulamentus kona-ba kuarentena ne’ebé rigorozus tebes.
Governu halo avansus barak ona no tau rekursus ne’ebé natón atu promove dezenvolvimentu merkadu lokál, aumenta fornesimentu agríkola rai laran nian, buka muda agrikultura subsistênsia ba agrikultura ne’ebé orienta liu ba merkadu lori aselera dezenvolvimentu ekonómiku ba komunidades tomak.
Governu sei la apoia kualkér proposta investimentu ne’ebé bele kria fali desvantajen ba ami nia progresu iha agrikultura, ka tau iha risku ami nia agrikultores lokais no merkadus.
Deklarasaun ambígua ne’ebé kompanhia halo ne’e, la loos í la tuir realidade; Governu fó hatene ona ba reprezentantes relasoens públikas Sino Green Foods nian katak tenke dada tomak fali nia deklarasaun ne’e.
