Sekretáriu Estadu Komunikasaun Sosiál (SEKOMS), Merício Juvenal dos Reis “Akara” akompaña hosi Sekratária Estadu Negósiu Estanjeiru no Kooperasaun Portugal nian, Teresa Ribeiro, Vise-Prezidente Institutu Camões IP, Gonçalo Teles Gomes no embaixadór Portugal mai Timor-Leste, José Pedro Machado Vieira, entrega sertifika ba formandu na’in atus ida (resin) rua (102), iha Palásiu Governu, loron 9 fulan-outubru tinan 2018.

Formandu sira ne’ebé simu sertifikadu hamutuk 102 mai hosi nível báziku (A1-A1) turma G no H ho total formandu hamutuk haatnulu-resin-ualu (48), nível intermédiu (B1) turma D no E-F hamutuk tolunulu-resin-sia (39) no nível intermédiu (B2) turma C hamutuk sanulu-resin-lima (15).

CLJ forma ona formandu hosi órgaun komunikasaun sosiál sira iha timor-leste no mós ofisiál sira komunikasaun sosiál governu nian hamutuk atus rua sanulu-resin-ualu (218).

Sekretáriu Estadu Komunikasaun Sosiál, Merício Akara iha ninia intervensaun hateten, lian portugés, nu’udar língua ofisiál ida ba ita Timor-Leste aliende tetun, tanba ne’e importante tebes ba ita atu bele domina lian portugés, aliende fasilita, loke mós oportunidade boot liu ba ita-nia karreira.

Sekretáriu Estadu ne’e mós  apresia ho kooperasaun ne’ebé iha ona entre entre Portugal no Timor-Leste.

“Ha’u apresia ho kooperasaun ne’ebé estabelese ona entre nasaun rua ne’e, iha kontestu aprende no hasa’e abilidade lian portugés, ida ne’e fortifika liután ita-nia lasu amizade”, dehan Akara.

Iha fatin hanesan Sekratária Estadu Negósiu Estanjeiru no Kooperasaun Portugal nian,  Teresa Ribeiro felisita formandu sira  ba sira-nia dezempeñu no agradese mós formadór sira ne’ebé fó sira-nia di’ak tomak ba alunu sira ne’e hodi sira bele to’o iha nível ida agora sira iha ba no halo sai possivel loron ida ohin hodi fahe sertifikadu ba hirak neebe komprova sira-nia konesimentu, sira nia dominiu iha lian portugés.

Sekretária Estadu ne’e mós akresenta liután katak nia nota iha diferensa maka’as iha imprensa hakerek lian portugés kompara ho tinan rua kotuk liubá.

 “Iha diferensa boot entre imprensa hakerek (Imprensa escrita) iha portugés iha Timor-Leste tinan rua liubá kompara ho ohin loron nian. Iha diferensa, iha mundansa boot no mudansa ne’e iha tamba imi hotu nia interese, imi-nia esforsu no imi-nia dedikasaun hodi aprende lian portugues”.

Partisipa iha serimónia entrega sertifikadu ne’e Adjuntu Sekretária Estadu Negósiu Estranjeiru no Kooperasaun (SENEC) Portugal, João de Albuquerque; Adida Kooperasaun, Cristina Faustino; Enkarregada Sesaun Konsular, Joana Sousa Fialho Pinheiro; Xefe Gabinete SECOMS, Julio Gonsalves; Diretór Nasionál no Xefe Departamentu sira iha ámbitu SECOMS nian, no mós formadora sira hosi Consutório da Língua para Jornalistas (CLJ).