Sekretáriu Estadu Komunikasaun Sosiál (SEKOMS), Merício Juvenal dos Reis “Akara” simu vizita kortezia hosi Sekratária Estadu Negósiu Estanjeiru no Kooperasaun Portugal nian, Teresa Ribeiro, ne’ebé akompaña hosi Vise-Prezidente Institutu Camões IP, Gonçalo Teles Gomes, embaixadór Portugal mai Timor-Leste, José Pedro Machado Vieira no komitiva, iha Palásiu Governu, loron 9 fulan-outubru tinan 2018.

Iha vizita kortezia ne’e, omólogu na’in rua ko’alia kona-ba kooperasaun iha área komunikasaun sosiál nian ne’ebé durante ne’e la’o hela no iha mós hanoin atu haluan tan kooperasaun ne’e ba iha parte sira seluk.

Sekretáriu Estadu Komunikasaun Sosiál, Merício Akara hateten, reprezenta governu Timor-Leste nia apresia tebes ho kooperasaun ne’ebé la’o hela entre nasaun rua, tanba iha rezultadu ne’ebé pozitivu tebes.

Hosi parte rua iha interesse atu kontinua ho kooperasaun iha área komunikasaun sosiál nian liu-liu ba iha koopersaun entre ajénsia Lusa no ajénsia Tatoli no mós hahú iha komunikasaun entre RTTL no RTP atu identifika nessesidade ka programa saida mak RTTL presiza atu iha kooperasaun ho RTP, tenik Akara.

Iha fatin hanesan Sekratária Estadu Negósiu Estanjeiru no Kooperasaun Portugal nian,  Teresa Ribeiro hateten, iha sosiedade demokrátiku ida, importante tebes atu jornalista sira haknar sira-nia missaun no atividade ho di’ak, tanba jornalista sira iha papel desizivu atu informa sidadaun  sira atu sira bele halo sira-nia eskolla polítika ne’ebé konsiente, ida ne’e mak importante.

Sekretária Estadu ne’e mós subliña liután katak, RTP iha konteúdu ka programas barak ne’ebé bele fó mai Timor-Leste, sira (RTP) disponível atu halo ida ne’e, portantu parte Portugal nian sei aselera prosesu ida ne’e.

Iha parte seluk, Lusa mós disponivel atu kria kooperasaun ruma ho Timor-Leste, tenik  Sekretária Estadu.