REPÚBLIKA DEMOKRÁTIKA TIMOR-LESTE

IV GOVERNU KONSTITUSIONAL

SEKRETARIA ESTADU KONSELLU MINISTRU

Komunikadu Ba Imprensa

Sorumutuk Extraordinário Konsellu Ministru Loron 23 fulan Maiu 2009

Konsellu Ministru hala’o tiha sorumutuk extraordinária ida iha Sábadu semana liu ba, loron 23 fulan Maiu 2009, iha Institutu Siênsia no Saúde, iha Komoru, Díli, ne’ebé mak aprova tiha :

Envelope fiskal global, ho hanoin atu prepara Orsamentu Estadu ba tinan 2010. Tuir hare kona-bá preparasaun orsamentu Konsellu aprova tiha mos data hodi halo apresentasaun ba proposta ministériu ne’ebé relasiona ba kategoria capital dezenvolvimentu no apresentasaun final husi projektu orsamentu Ministériu sira nian.

Tuir halo preparasaun husi orsamentu, Governu aprpova tiha mos prioridade nasional hirak tuir mai ne’e ba tinan oin mak hanesan:

-Infra-estrutura (abastesimentu ba beé no estrada);

-Seguransa aihan;

-Kualifikasaun ba Rekursu Umanu;

-Asesu ba Justisa;

-Servisu Sosial no Desentralizasaun Administrativa;

-Boa Governasaun;

-Seguransa Públika.

Prioridade hirak ne’e hetan objektivu ikus mak hanesan kontinua garante estabilidade iha País.