Sekretáriu Estadu ba Komunikasaun Sosiál (SEKOMS), Merício Juvenal dos Reis “Akara” loke formasaun ba jornalista Timor-Leste ho tema “promove jornalizmu sensível jéneru” ne’ebé organiza hosi Caucus ho Movimentu Organizasaun ba Feto Foin-Sa’e (MOFFE) durante loron tolu, hahú hosi loron 25 to’o loron 27 fulan-setembru tinan 18, iha Tower Fatuhada, iha Dili.

Merício”Akara” hateten, formasaun ida-ne’e atu fó koñesimentu kle’an kona-ba igualdade jéneru para hahú ohin ba oin jornalista sira mós iha koñesimentu kona-ba saida mak igualdade jéneru no valores, atu nune’e bainhira sira halo programa ka notísia ruma bele mós halo sensibilidade ba jéneru,

SEKOMS informa, organizasaun feto sira mós kolabora ho United Nations Development Programme (UNDP) hodi promove envolvimentu feto iha vida polítika, hakarak promove feto potensiál sira hodi bele partisipa iha polítika atu bele foti desizaun iha instituisaun hotu hahú husi instituisaun media sira, Estadu no polítika, atu nune’e bele sai futuru lideransa feto.

Akara hatutan, lori governu nia naran sei apoia ba movimentu igualdade jéneru hodi evita violénsia doméstika, liu-liu ba ita-nia media sira tanba média ne’e iha pilar importante mós ba igualdade jéneru.

Iha Fatin hanesan, Diretóra Caucus, Paula Corte Real mós informa katak, objetivu hosi formasaun ne’e atu promove no haree estratéjia ba oin liu-liu ba parte kobertura no reportajen bele sensibiliza jéneru hodi bele promove liu maluk feto potensiál sira ninia perfil ne’ebé mai husi maluk lideransa feto sira no mós feto potensiál sira seluk ne’ebé prepara hela atu promove sai nu’udar lideransa, tanba ne’e mak fundasaun CACUS ho MOFFE halo formasaun ida-ne’e atu buka oinsá estratéjia liu hosi formadór sira ne’ebé mai ho koñesimentu di’ak ba asuntu jéneru, bele lori kolega media sira liu-liu iha parte termolojia sira ne’ebé atu bele sensibiliza liu no mós loke sosiedade Timor-Leste ninia haree, hanoin no aumenta sira-nia koñesimentu kona-ba igualdade jéneru.

Partisipa iha serimónia abertura ne’e, Diretora CAUCUS, Paula Corte Real, Diretóra MOFFE, Yacinta Lujina, Chief Tecnhical Advisor Electoral Project- LEARN UNDP Timor-Leste, Andréas del Castillo sánches.